Bas shyrshanyń shyraǵyn jaǵý rásimi búkil el boıynsha merekelik sharalardy bastap berdi
ASTANA. QazAqparat - Memleket basshysy Nursultan Nazarbaev jańajyldyq bas shyrshanyń shyraǵyn jaǵý rásimine qatysty.
Elbasy rásim barysynda qatysýshylardyń barlyǵyn aldaǵy Jańa jylmen jáne eldiń bas shyrshasy shyraǵynyń jaǵylýymen quttyqtady, dep habarlady Aqordanyń baspasóz qyzmeti.
«Jańa jyl - ásirese óskeleń urpaq úshin asyǵa kútetin aıryqsha mereke. Jańa jyl saltanatyna deıingi aı armandaýmen jáne ǵajaıypty kútýmen ótedi. Barlyq qalaýlaryńyzdyń oryndalýyna tilektespin. Bizdiń elimizdiń maqsaty - Máńgilik el bolý, álemniń damyǵan 30 eliniń qataryna qosylý. Biz elimizdi damytyp, onyń halyqaralyq arenadaǵy bedelin kóterýge umtylýymyz kerek. Aǵa býyn, sonyń ishinde senderdiń ata-analaryń naq sol úshin jáne Qazaqstan jastarynyń ıgiligi úshin jumyla eńbek etýde. Biz týǵan eldi, onyń astanasyn, taýlary men saı-salasyn, ormany men dalasyn, ózenderi men kólderin súıemiz. Osynyń bári - bizdiń Otanymyz», - dedi Qazaqstan Prezıdenti.
Sońynda Nursultan Nazarbaev barshaǵa myqty densaýlyq, oqý men eńbekte tabys, ıgilik jáne baq-bereke tiledi.
Merekelik shoýǵa 2300-den astam oqýshy jáne qalanyń belgili shyǵarmashylyq ujymdary qatysty.
Rásim arqyly búkil el boıynsha merekelik sharalar bastaldy.
