Bas sanıtarlyq dáriger jasandy jumyrtqa týraly pikir bildirdi

ASTANA. QazAqparat - Qazaqstannyń bas sanıtarlyq dárigeri Jandarbek Bekshın jasandy jumyrtqa týraly vıdeony teriske shyǵardy, dep habarlaıdy QazAqparat tilshisi.

«Jumyrtqa týraly Internetke taraǵan vıdeony 100 paıyz feık dep ataýǵa bolady. Atalǵan aqparat boıynsha Óskemen qalasynda tekserý júrgizdik. Ol jaqta tek qana otandyq jumyrtqalar satylyp jatyr. «Sılıkon» jumyrtqa esh jerden kezikpedi. Vıdeony túsirip, ınternetke júktegen adamdy da eshkim tappady», - dedi Jandarbek Bekshın Astanada ótken baspasóz máslıhatynda.

Onyń aıtýynsha, beınejazbadaǵy sózderdiń jalǵan ekenin birden ańǵarýǵa bolady.

«Sebebi, vıdeoda adam qolynan basqa eshteńe túsirilmegen. Eger shyn múddeli bolsa, adam óz aty-jónin kórsetip, ónimniń ataýyn aıtar edi. Jumyrtqa markasynyń ózi Qazaqstandiki emes. Áńgimelerine qaraǵanda, vıdeo Qyrǵyzstanda túsirilgen bolýy múmkin. Mundaı jumyrtqanyń Qazaqstanda bolýy múmkin emes», - dedi ol.

Eske sala ketsek, áleýmettik jelide jasandy jumyrtqa týraly vıdeo taralǵan bolatyn. Onda er adam qytaılyq «rezeńke» jumyrtqalardyń Óskemen qalasyna jetkenin aıtady.