Bas sanıtarlyq dáriger «sarqyt» salýǵa da salmaqty qaraýǵa shaqyrady
ASTANA. 5 tamyz. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda Qazaqstannyń Bas sanıtarlyq dárigeri Jandarbek Bekshın halyqtyń toı-tomalaqtan alatyn sarqytyna da salmaqty qaraý kerektigin aıtyp,
sómkege salynatyn «sarqyttyń» quramyna biraz ózgerister engizip tastady.
Brıfıng barysynda tamaqtan ýlanýdyń aldyn alý týraly máselege toqtalǵan Bas sanıtar, orazanyń aıaqtalyp, musylman qaýymy úshin Aıt merekesi bastalar aldynda tıisti qujattary joq taýarlardy tutynýdan saqtanýǵa shaqyrdy. Sonymen qatar, Jandarbek Bekshın úsh kúndik mereke kezinde dastarhandy tez buzylatyn taǵamdardan saqtaý qajettigin de kóterip, onyń ishinde, ásirese qaımaq pen maıonez qosylatyn salattardan shekteý týraly eskertti.
«Qazaqta dástúrli «sarqyt» degen bar, bul sarqytqa et te salynady, jemis-jıdek te salynady, salattar da salynady. Bizdiń usynysymyz, sarqytqa kámpıt, pechene, jemis-jıdekter, shyǵys táttileri sekildi taǵy da basqa qurǵaq ári jeńil tamaqtar salynýy kerek. Bundaı qarapaıym qaǵıdalardy saqtasaq qana biz densaýlyqty da saqtaımyz, merekelik kóńildi de buzyp almaımyz», - dedi Bas sanıtarlyq dáriger.
