Bas sanıtarlyq dáriger otandyq qus etin jeýge keńes berdi
ASTANA. QazAqparat - Búginde shetelden, tipti kórshi Reseı men Belarýstan adam densaýlyǵyna qaýipti qus eti jetkiziledi. Al otandyq ónimder birneshe tekseristen ótip turady, dep xabarlaıdy QazAqparat tilshisi.
QR Densaýlyq saqtaý mınıstrligi qoǵamdyq densaýlyqty saqtaý komıtetiniń tóraǵasy Jandarbek Bekshınniń aıtýynsha, otandyq qus ónimderin eki birdeı mınıstrlik tekseredi. Taýardy óndirý protsesin aýyl sharýashylyǵy mınıstrligi baqylasa, densaýlyq saqtaý mınıstrligi daıyn ónimdi tekserip otyrady. "Budan bólek, bizdiń terrıtorıaldyq organdarymyz qus fabrıkalaryna jıi baryp turady. Sonda otandyq ónimder úsh birdeı tekseristen ótedi. Alaıda, ımporttyq taýardy tek dúkenge túskende ǵana baqylaýǵa alady. Sonyń saldarynan elimizge sapasyz taýarlar jetkiziledi. Bizge Reseı men Belarýsten qus eti kóp keledi. Onyń ishinde sapasyz, tipti adam densaýlyǵyna qaýipti ónimder az emes», - dedi J.Bekshın «Atameken» UKP-synda ótken kezdesýde.
Onyń aıtýynsha, sońǵy tórt aıdyń ishinde tamaq ónimderiniń biraz bóligi tekserildi. Sol kezde taýardyń quramy men syrtqy jazýlaryna qatysty birqatar tártip buzýshylyqtar anyqtaldy. Máselen, qus etine sý, tipti fosfaty bar suıyqtyqtardy qosyp jatady. Sonyń nátıjesinde ettiń salmaǵy artady.
Aıta keteıik, buǵan deıin QR Densaýlyq saqtaý mınıstrligi shetelden keletin taýyq etine jasalǵan saraptamanyń nátıjesin jarııalaǵan bolatyn. «Biz salmonella, lısterııa, ishek taıaqshasy sııaqty potogendi mıkroflorasy bar ónimderdi anyqtadyq. Sonyń ishinde «Brıanskıı broıler», «Chebarkýlskaıa ptıtsa», «Nagaıbaksk qus kesheni», «FınInvest», «Injevınsk qus fabrıkasy» jáne «Prıoskole» bar. Bunyń barlyǵy - Reseıdiń ónimderi. Budan bólek, AQSh-tyń eki kompanııasy, sondaı-aq, Belarýstyń «Kýrınoe tsarstvo Brıansk», «Smolevıcha Broıler», «Vıtebsk broıler fabrıkasy», «Drýjba qus fabrıkasy» men «Servolıýks Agro»-nyń ónimderinde qaýipti mıkroflora anyqtaldy», - dedi bas sanıtarlyq dáriger Jandarbek Bekshın Astanada ótken baspasóz máslıxatynda.
