Bas sanıtarlyq dáriger qyzylshanyń jańa vırýsynan saqtanýǵa shaqyrdy

NUR-SULTAN. QazAqparat – Bas memlekettik sanıtarııalyq dáriger Jandarbek Bekshın ǵylymı jumystardyń nátıjesinde Qazaqstan aýmaǵynda qyzylshanyń eki serotıpi anyqtalǵanyn jarııa etti, dep habarlaıdy QazAqparat tilshisi.

Bas memlekettik sanıtarııalyq dárigerdiń aıtýyna qaraǵanda, elimizde 20-29 jas aralyǵyndaǵy eresekterdiń barlyǵyna vaktsınatsııa júrgizilip jatyr. Olardyń kóbine bala kezde ekpe jasalǵan. Sózine sensek, mundaı qajettilikke jýyqta ǵana shyqqan serotıpter sebep bolǵan.

«Qazaqstan aýmaǵynda eshqashan kezdespegen «Dýblın» jáne «Kabýl» serotıpteri anyqtaldy. Bizdiń aǵza ol vırýspen buryn eshqashan kezdesip kórmegen. Sondyqtan, aǵzamyz keı jaǵdaıda qorǵana almaı qalady. Sol sebepti bárine ekpe jasatyp jatyrmyz. Ekpe jasalǵandardyń kóbi de aýyryp qalyp jatyr. Sebebi, bul jańa vırýstar adamnyń ımmýndy qorǵanysyn buzyp kiredi. Sondyqtan, atalǵan jasta barlyqtaryńyzǵa ekpe jasatýǵa shaqyramyz», - dedi Jandarbek Bekshın OKQ-da ótken baspasóz máslıhatynda.

Onyń sózine qaraǵanda, bala kezde ekpe jasalǵan adamdar múlde egilmegenderge qaraǵanda kóp aýyrmaıdy.

«Alaıda juqtyrýdan saqtaný úshin 30 jasqa deıin taǵy bir vaktsına alǵan abzal. Eń birinshi kezekte 20-30 jastaǵy áıelderdiń vaktsına alǵany jón. Sebebi, osy sanatta aýyrǵandardyń sany kóp. Ekinshiden, bolashaqta balalardyń aýrýyn aldyn alý úshin jumys júrgizip jatyrmyz», - dedi ol.

Eske sala ketsek, buǵan deıin Jandarbek Bekshın ekpe jasalmaǵan bala balabaqshaǵa kirgizilmeıtinin málim etken edi.