Bas sanıtarlyq dáriger: Kópshilik koronavırýstyń qaýpin jete baǵalamaı otyr

NUR-SULTAN. QazAqparat - Elimizde koronavırýs sımptomymen dárigerlerdiń kómegine júgingen adamdar sany artty. Bul týraly QR memlekettik bas sanıtarlyq dárigeri Aıjan Esmaǵambetova aıtty, dep habarlaıdy QazAqparat tilshisi.

«Búgingi kúni koronavırýs ınfektsııasy sımptomdarymen medıtsınalyq kómekke júgingen adamdardyń sany artyp otyr. Bir apta ishinde mundaı adamdardyń sany 40 paıyzǵa, ótken aptaǵa qaraǵanda paıyzǵa shaqqanda 15-ten 17,5 paıyzǵa ósti. Ózdiginen medıtsınalyq kómekke júgingenderdiń artýy Nur-Sultan, Almaty qalalarynda, Pavlodar, Aqtóbe, Qostanaı oblystarynda baıqalady», - dedi bas sanıtarlyq dáriger Ortalyq kommýnıkatsııalar qyzmetindegi brıfıngte.

Onyń atap ótýinshe, ózdiginen medıtsınalyq kómekke júginder sanynyń artýy adamdardyń vırýstan qorǵaný sharalaryn saqtamaıtyndyǵyn kórsetip otyr.

«Ókinishke oraı, kópshiligi koronavırýs ınfektsııasy qaýpin jete baǵalamaı otyr. Bul óte juqpaly aýrý ekendigin, aǵza úshin iz-tússiz ótpeıtindigin, eń aldymen jasy úlken jaqyndarymyz - ata-ájelerimizge, ata-analarymyzǵa qaýipti ekendigin eskterińizge salǵym keledi», - dedi ol.

Osy rette bas sanıtarlyq dáriger koronavırýs ınfektsııasymen syrqattaný ósiminiń sebebine saraptama júrgizilgendigin atap ótti.

«Birinshisi - sanıtarlyq zalalsyzdandyrý rejımin kúsheıtý jónindegi belgilengen talaptardy saqtamaǵan, maska taqpaǵan, arashyqtyq saqtamaǵan, baılanystardy azaıtpaǵan eńbek ujymdarda taralýy. Ekinshisi - eńbek ujymynan tys áleýmettik baılanystardyń artýy. Biz qonaqqa baryp, ózimiz de qonaq shaqyryp jatyrmyz jáne mamandardyń keńesterine qaramastan gıgıenalyq jáne ózińdi qorǵaýdyń qarapaıym talaptary oryndaýdy - maska taǵýdy, antıseptıkterdi paıdalanýdy, araqashyqtyq saqtaýdy qoıdyq», - dedi Aıjan Esmaǵambetova.