Bas sanıtarııalyq dáriger bıyl elimizde qandaı aýrýlar tirkelmegenin aıtty

ASTANA. QazAqparat – Elimizde qyzylsha aýrýyn juqtyrý derekteri ósti. Bul týraly Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetova aıtty, dep habarlaıdy QazAqparat tilshisi.

«Bıylǵy 7 aıynda respýblıka turǵyndary arasynda 25 nozologııa, onyń ishinde tyrysqaq, oba, paratıfter, ish súzegi, týlıaremııa, sirespe, dıfterııa, polıomıelıt, qutyrma, bezgek, vıstseraldy leıshmanıoz, pasterellez aýrýlary tirkelgen joq. Byltyrdyń osy kezeńimen salystyrǵanda 39 ınfektsııalyq aýrý, onyń ishinde botýlızm 45 paıyzǵa, rotavırýstyq enterıt 25 paıyzǵa, qyshyma 9 paıyzǵa, salmonellez 12 paıyzǵa, týberkýlez 6 paıyzǵa tómendedi», - dedi A. Esmaǵambetova Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, qyzylsha aýrýyn juqtyrý derekteri ósti, qazirgi kezde qyzylshanyń 3 037 jaǵdaıy tirkeldi.

«Qazaqstan aýmaǵynda asa qaýipti ınfektsııalardyń tabıǵı oshaqtary: oba, týlıaremııa, kúıdirgi aýrýynyń, Kongo-Qyrym gemorragııalyq qyzbasy, búırek sındromy bar gemorragııalyq qyzba jáne basqalar ornalasqan. Jazǵy kezeńde kenelerdiń keńinen taralýyna qaraı aýrý faktileri ósedi. Elimizdiń 4 óńiriniń, ıaǵnı Jambyl, Qyzylorda, Túrkistan oblystary men Shymkent qalasynyń aýmaǵynda Kongo-Qyrym gemorragııalyq qyzbanyń tabıǵı oshaqtary bar. Jyl saıyn óńirlerdiń ákimdikteri men Sanıtarııalyq-epıdemıologııalyq aýmaqtyq departamentteri kóktemde aýrýdyń taralýyna jol bermeý maqsatynda tabıǵı oshaqtarda kenege qarsy is-sharalar uıymdastyrady», - dedi vıtse-mınıstr.

Budan buryn habarlanǵandaı, Almatyda qyzylsha boıynsha epıdemıologııalyq jaǵdaı kúrdelene tústi.