Bas sanıtar dáriger: Burynǵysha bolsyn desek – jeke bas qaýipsizdigine jaýapkershilikpen qaraıyq
- Qazirgi ýaqytta koronavırýs boıynsha epıdemıologııalyq jaǵdaı turaqtalǵany belgili. Osy dınamıkany saqtap qalý maqsatynda qandaı sharalar qolǵa alynyp jatyr?
- QR Densaýlyq saqtaý mınıstrligi janynan koronavırýs ınfektsııasynyń jıiligin boljaý jáne qajetti sharalardy ázirleý úshin jumys toby quryldy. Jumys toby orta merzimdi (osy jyldyń 31 jeltoqsanyna deıin) jáne qysqa merzimdi (15 kúnge deıin) boljam jasaıdy. Qazirgi ýaqytta juqpaly aýrý aýrýhanalarynyń naýqasty qabyldaýǵa jáne qajetti kómek kórsetýge daıyndyǵy qamtamasyz etilip, qajetti mólsherde dári-dármek pen jeke qorǵanys quraldary satyp alyndy.
- Elimizdiń qaı aımaǵynda koronavırýspen aýyrý boıynsha kórsetkish joǵary, qaı aımaqta tómen?
- Búgingi kúni elimizde COVID-19-dyń rastalǵan 108 362 jaǵdaıy tirkeldi, táýligine 66 jaǵdaı (aýrý belgileri bar – 39, aýrý belgleri joq – 27), tirkelip, 0,06% ósken. COVID-19-dyń jańa rastalǵan jaǵdaılary Shyǵys Qazaqstan oblysynda (14 jaǵdaı) jáne Nur-Sultan qalasynda (11 jaǵdaı) tirkeldi. Sońǵy táýlikte Mańǵystaý men Aqtóbe oblystarynda aýrýǵa qatysty birde-bir jaǵdaı tirkelmegen.
- Turǵyndardyń bári karantın sharalaryn qatań túrde saqtaı bermeıdi. Qatań karantın rejımi qandaı jaǵdaıda engiziletini týraly taǵy bir márte aıtyp óte alasyz ba?
- Elimizde qatań karantın rejımi qandaı jaǵdaıda engiziletinin anyqtadyq. Juqpaly aýrýmen aýyrǵandar jatatyn orynnyń 70%-dan astamy bos emes bolsa, reprodýktsııa koeffıtsıenti (R) 1-den kóp bolsa jáne 7 kún ishinde aýyrǵandar sany 100 myń turǵynǵa shaqqanda 50 jaǵdaıdan asatyn bolsa qatań karantın rejımi engiziledi.
- Elimiz boıynsha qandaı nysandar karantın talaptaryn jıi buzady?
- Respýblıkada oblystyń ákimdikteri janynan komıtettiń aýmaqtyq departamentteriniń, jergilikti polıtsııa qyzmeti men kásipkerler palatasynyń qyzmetkerlerin qamtıtyn baqylaý toptary jumys isteıdi.
Karantın sharalaryn kóbinese qoǵamdyq tamaqtaný nysandary (dámhana, meıramhana), saýda ortalyqtary, bazar, dúken, túngi klýb, qurylys kompanııalary, sulýlyq salony, saýnalar buzady. Otbasylyq merekelik is-sharalar: úılený toıy, mereıtoı, as berý sekildi buzýshylyqtar bolyp turady, mundaı jerge kóp adam jınalady. Mundaı jaǵdaılarda áleýmettik araqashyqtyq saqtalmaıdy jáne maska taǵý rejımin de eshkim saqtamaıdy. Kóbinese Almaty, Nur-Sultan jáne Shymkent qalalarynda, sondaı-aq Atyraý men Mańǵystaý oblystarynda osyndaı jaǵdaılar kóbirek bolady.
Baqylaý toptary kóbinese karantın kezeńinde qyzmetine tyıym salynǵan nysandardyń jasyryn jumys isteıtindigin anyqtaıdy. (Mysaly, túngi klýbtar nemese qorqor shegetin oryndar). Mekemelerde otyratyn qyzmetkerler de maska taǵý erejesin jıi buzyp, medıtsınalyq qolǵap kımeıtin jáne antıseptık qoldanbaıtyn jaǵdaılar da ushyrasyp turady.
- Qazirgi ýaqytta elimizde JRVI jáne tumaýmen aýyrǵandar kórsetkishi qandaı bolyp tur?
- Qazirgi ýaqytta elimizde tumaýmen aýyrǵan faktiler joq. Jiti respıratorlyq vırýs ınfektsııasyna keletin bolsaq, 1 qyrkúıekten bastap 437 951 adam tirkeldi. Bul byltyrǵy osy ýaqytpen salystyrǵandaǵy kórsetkishten joǵary. Al jalpy atalǵan aýrý boıynsha epıdemıologııalyq jaǵdaı turaqty deýge bolady.
- Qazirgi ýaqytta qoǵamda kınoteatrlardyń jumysyn jandandyrý máselesi talqylanyp jatyr. Kınoteatrlar qandaı jaǵdaıda ashylýy múmkin?
- Bul máselege jaýap joq. Eń aldymen elimizdegi epıdemıologııalyq jaǵdaıdy esepke alamyz. Sonymen qatar, basqa da memleketterdiń tájirıbesine súıenip, jaǵymdy-jaǵymsyz tusyna nazar aýdara otyryp sheshim qabyldaımyz.
- Keńsege baryp jumys isteıtinder arasynda koronavırýs juqtyryp alý qaýpi joǵary bolyp tur. Olar áli de jumysty qashyqtyqtan isteı turǵany durys pa, qandaı usynys aıtar edińiz?
- Ujymnyń 50%-yn áli de qashyqtyqtan jumys istete turýdy usynamyz. Bul norma 2020 jyl 16 qyrkúıektegi № 53 qaýlyda jazylǵan.
- Aıtylyp jatqan eskertýge qaramastan otbasylyq mereke uıymdastyryp jatqan otbasylar bar. Ol jerge eń kem degende 20-50 adam jınalady. Tártipke baǵynǵysy kelmeıtin osyndaı turǵyndarǵa qandaı keńes aıtasyz?
- Biz turǵyndardy toptasyp kezdesýden bas tartýǵa, adam kóp júretin jerge barmaýǵa shaqyramyz. Vırýs eshqaıda joǵalyp ketken joq. Jeke qaýipsizdigimizge qanshalyqty jaýapkershilikpen qaraı alamyz – burynǵy ómir saltyna sonshalyqy tez oralýǵa múmkindigimiz bar.
- Suhbatyńyz úshin rahmet!