Bas sanıtar: Bizdiń masalar aýrý juqtyrmaıdy

NUR-SULTAN. QazAqparat - «Bizdiń masalar aýrý juqtyrmaıdy. Kóp bolsa, allergııa týǵyzýy múmkin». Ortalyq kommýnkatsııalar qyzmetinde ótken brıfıngte QR Bas memlekettik sanıtarııalyq dárigeri Jandarbek Bekshın osylaı aıtty, dep habarlaıdy QazAqparat tilshisi.

Brıfıng barysynda Nur-Sultan qalasynda bıyl masalar shabýyly jıilep ketkeni týraly birneshe saýal qoıylǵan bolatyn. Bas sanıtar masamen kúres sharalary bıyldan bastap QR Densaýlyq saqtaý mınıstrliginen jergilikti ákimdikterdiń mindetine berilgenin atady.

«Qala kúniniń aldynda ǵana elordada nóser jaýyndar bolǵany esterińizde shyǵar. Sol jaýynnyń saldarynan masalar erekshe qaptap tur», - deıdi Jandarbek Bekshın.

Ol sondaı-aq, masamen kúreste dári shashýmen shektelmeı, jańa tásilder izdeý qajettigin de atady.

«Bir aıta ketetin dúnıe, bizdiń masalar aýrý juqtyrmaıdy. Kóp bolsa, allergııa týǵyzýy múmkin. Al tropıkalyq elderde bezbekter men qyzbalardyń kóbi osy masalardan juǵyp jatady. Sondyqtan shetelge barǵan kezde ornalasqan úıińizdiń terezesinde shybyn-shirkeıge qarsy tor qurylǵanyna kóz jetkizý qajet. Syrtqa shyqqan kezde ashyq tústi kıim kıgen durys. Ondaı kıimnen denege qandaı jándik qonǵanyn birden ańǵarýǵa bolady», - deıdi Jandarbek Bekshın.

Bas sanıtar bıyl Qazaqstanda kene qaýpi jaz boıy saqtalatynyn da aıtty.

«Bıyl el aýmaǵynda kenelerdiń belsendiligi jaz boıy saqtalatyn túri bar. Jylda keneler kóktemniń sońǵy aıy men jazdyń birinshi aıynda ǵana taralatyn. Bıyl jaz jańbyrly bolyp tur. Bul olardyń taralýyna óte qolaıly. Sondyqtan, bıyl jaz boıy kene qaýpi saqtalady», - dedi ol.

Eske salsaq, Jandarbek Bekshın álemdegi qaýipti ári juqpaly aýrýlarǵa beıim elderdi ataǵan bolatyn.

Onyń aıtýynsha, shetelge saıahat kezinde teńiz taǵamdaryn baıqap tutyný qajet.