Bas sanıtar: Atyraýda karantın merzimine qatysty taraǵan aqparat - jalǵan
ATYRAÝ. QazAqparat – Atyraýda karantın merzimine qatysty taraǵan aqparatty oblystyń bas memlekettik sanıtar dárigeri joqqa shyǵardy, dep habarlaıdy QazAqparat.
Buǵan deıin áleýmettik jelide karantın sozylǵany jóninde qańqý sóz taraǵan bolatyn.
«10 maýsym kúni keshke saǵat 18.00-de Maqat aýdany men Jyloı aýdanynda karantın 21 maýsymǵa deıin sozylady. Atyraý qalasy, Qyzylqoǵa, Qurmanǵazy aýdandary karantınge jabylady. 10 maýsym túngi 23.59-dan bastap Atyraý qalasy kóshelerinde kólik qozǵalysy shekteledi. 11 maýsym kúni azyq-túlik alý maqsatynda bir úıden bir adam ǵana shyǵa alady, árbir úıge ruqsat qaǵazy taratylady» delingen taraǵan habarda.
Atalǵan aqparatty oblystyń bas memlekettik sanıtar dárigeri Amantaı Jumaǵalıev joqqa shyǵaryp, jalǵan ekenin rastady.
«Bul habarlardyń ótirik ekenin eskertemin. Derekterdi resmı aqparat kózinen alýdy suraımyn» dedi ol.
