Bas reprodýktolog júktilik aldyndaǵy vaktsınalaýǵa qatysty keńes berdi
NUR-SULTAN. QazAqparat – Qazaqstan reprodýktıvti medıtsına qaýymdastyǵynyń prezıdenti, Qazaqstannyń bas reprodýktology Vıachaslav Lokshın júkti áıelderge koronavırýstyń áseri týraly aıtty, dep habarlaıdy QazAqparat tilshisi.
«Júkti áıelder COVID-19 indetin qıyn eńseredi. Sondyqtan onyń bir ǵana balamasy bar, ıaǵnı júkti bolǵanǵa deıin vaktsınalanǵan jón. Qarsy kórsetilimder bolmasa, ekstrakorporaldy uryqtandyrý (EKU) baǵdarlamasyna daıyndalyp júrgen patsıentterge vaktsınanyń eki dozasyn alýǵa keńes beremiz. Ekinshi ekpeden keıin bir aıdan soń olar EKU baǵdarlamasyna qatysa alady. Sonymen qatar, júktilikti josparlap júrgen erli-zaıyptylarǵa da osyndaı keńes beremiz», - dedi Vıachaslav Lokshın Ortalyq kommýnıkatsııalar qyzmetinde.
Onyń aıtýynsha, eger áıel adam júkti ekenin bilmeı vaktsına saldyrsa, onda júktilikti toqtatý boıynsha áreketke barmaý kerek.
«Tıisti skrınıngter bar jáne sonyń barasynda barlyǵyn kórýge bolady. Tájirıbe kórsetkendeı, jeńil sımptomdy formada koronavırýspen aýyrǵan áıelderdiń jaǵdaıy jaqsy bolady, náreste indet juqtyrmaı dúnıege keledi. Sondyqtan EKU baǵdarlamasyna, júktilikke daıyndalyp júrgenderdi vaktsınalaýdyń tolyq kýrsynan ótýge shaqyramyn», - dedi V. Lokshın.
Budan buryn habarlanǵandaı, baspasóz máslıhatynda vaktsınanyń birinshi komponentiniń ornyna ekinshi komponentin salýdyń keri saldary bolmaıtyny aıtyldy.
