Bas redaktorlar klýbynyń jańa quramy saılandy
Onda 2012 jylǵy 20 sáýir men 2013 jylǵy 19 sáýir aralyǵynda Klýb tarapynan atqarylǵan jumystar týraly qoǵamdyq birlestik prezıdenti Kenjebolat Joldybaıdyń esebi tyńdalyp, basqarmanyń jańa quramy saılandy.
Bul týraly Bas redaktorlar klýbynyń baspasóz qyzmeti habarlady.
2007 jyldyń qońyr kúzinen jumysyn bastaǵan «Bas redaktorlar klýby» qoǵamdyq birlestigi búginde aýzy dýaly, sózi ýáli, 222 aımaqtyq jáne respýblıkalyq BAQ basshylaryn biriktirgen, elimizdiń 7 óńirinde aımaqtyq bólimshesi bar irgeli uıymǵa aınalyp, qoǵamda shyǵarmashylyq ahýaldy nyǵaıtýǵa, mass-medıa arasynda tıimdi qarym-qatynas pen ózara qurmetteý aýanyn ornyqtyrýǵa, aqparattyq naryqty órbitýge, ultaralyq kelisim men qalyptylyqty saqtaýǵa kúsh salyp keledi.
Bul uıymǵa sońǵy bir jylda jetekshilik etken Klýbtyń jańa basqarma quramy qalyptasqan úrdisti odan ári damyta otyryp, naqty is-sharalardy atqardy. Osy rette, Klýb bılik pen BAQ arasynda tyǵyz yntymaqtastyq ornatýdy, ásirese qyzmetteri áleýmettiń kóńil-kúıine tikeleı áser etetin basshylarmen únemi baılanysta bolýdy turaqty nazarda ustaǵanyn aıtqan jón. Máselen, QR Eńbek jáne halyqty áleýmettik qorǵaý mınıstrligimen yntymaqtastyq týraly Memorandýmǵa qol qoıylyp, sonyń sheńberinde burynǵy mınıstr Gúlshara Ábdihalyqovamen Elbasynyń «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty maqalasyn talqylaý maqsatynda on-line konferentsııa ótkizildi, aımaqtarda «Jumyspen qamtý - 2020» baǵyty boıynsha press-týrlar boldy. Munyń syrtynda, QR Kólik jáne kommýnıkatsııa mınıstrimen, Týrızm komıtetiniń tóraǵasymen jáne Din isteri agenttigi tóraǵasymen Internet-konferentsııa uıymdastyryldy. Sondaı-aq, Klýb músheleri QR Kólik jáne kommýnıkatsııa mınıstrimen, Syrtqy ister mınıstrimen, Din isteri agenttigi tóraǵasymen, «Nur Otan» HDP tóraǵasynyń birinshi orynbasy Baýyrjan Baıbekpen, «Samuryq Qazyna» UÁQ basshylyǵymen kezdesip pikir alysty.
Klýb jýrnalısterge jáne jýrnalıstıkaǵa qatysty ózekti máselelerdi sheshýge atsalysty, sóz bostandyǵyna, adam quqyǵyna baılanysty barlyq is-sharalarǵa belsendi túrde aralasty. Aıtalyq, azamattardyń aqparat alý konstıtýtsııalyq quqyqtaryn tolyqtaı qamtamasyz etý maqsatynda qazir Parlamentte jatqan «Kópshilik aqparatqa qoljetimdilik týraly» zańnyń tezirek qabyldanýy, Jala men namysyn qorlaý quramyn zańnamalyq deńgeıde krımınalsyzdandyrý, olardy azamattyq-quqyqtyq jaýapkershilik sanatyna kóshirý, Abyroıy men qadir-qasıetin qorǵaý tóńireginde talap etiletin moraldyq zııandy óteý ótemaqylardyń joǵary shekterin belgilep, BAQ-taǵy dıffamatsııa úshin qylmystyq jaýapkershilikti alyp tastaý, jýrnalısterdiń áleýmettik statýsyn anyqtaý qajettiligine bıliktiń nazaryn turaqty aýdaryp keledi. Sonymen birge, Bas redaktorlar klýby QR Syrtqy ister mınıstrligi janyndaǵy Adamı ólshemder jónindegi Jumys Tobynyń múshesi bolyp tabylady.
Jýrnalısterdiń kásibı biliktiligin arttyrý jolynda da Klýb birshama isterdi qolǵa aldy. Osy rette, «Qazaqstandyq jýrnaldar: ózekti máseleleri jáne sheshý joldary» atty respýblıkalyq dóńgelek ústel, respýblıkalyq jáne aımaqtyq BAQ-tardyń festıval-kórmesin ótkizdi. Sonymen qatar, Klýb tarapynan Pavlodarda ótken «Jýrnalıstıkanyń ózekti máseleleri jáne bolashaǵy» halyqaralyq medıa-forýmǵa, Almatyda «Qazaq» gazetiniń 100 jyldyǵyna baılanysty ál-Farabı atyndaǵy Qazaq memlekettik ýnıversıtetinde ótken ǵylymı-praktıkalyq konferentsııaǵa qoldaý kórsetildi, jýrnalısterge AQSh Kent ýnıversıtetiniń oqytýshysy Karl Idsvogtiń «Qazirgi medıa - dástúrli BAQ» taqyrybynda sheberlik synyby, Turǵyn úı-kommýnaldyq sharýashylyǵyndaǵy reformanyń mán-mazmunyna qatysty oqý-ádistemelik semınar uıymdastyryldy, Klýbtyń bes jyldyǵyn atap ótý sheńberinde «Asyl sóz qudireti» baıqaýy ótkizildi, «BAQ tusaýkeseri» atty aqparattyq joba iske qosyldy.
Eń bastysy, táýelsiz elimizdiń tarıhynda tuńǵysh ret Qazaqstan Respýblıkasy jýrnalısiniń etıkalyq kodeksi qabyldandy. Klýb bul ıgilikti iske belsene aralasyp qana qoımaı, ony qoldaý maqsatynda EQYU-nyń BAQ erkindigi máseleleri jónindegi resmı ókili Dýnıa Mııatovıchpen kelissózder júrgizip, Qazaq agrotehnıkalyq ýnıversıteti stýdentteriniń kúshimen flesh-mob uıymdastyrdy, al ózi bas ofısi AQSh-ta ornalasqan Medıalyq etıka halyqaralyq ortalyǵyna áriptes retinde qabyldandy.
Bas redaktorlar klýbynyń esep berý-saılaý konferentsııasynda onyń prezıdenti Kenjebolat Joldybaıdyń ókilettiligi keler jylǵa deıin uzartylyp, vıtse-prezıdentteri bolyp belgili jýrnalıster, respýblıkalyq BAQ basshylary Sh.Syzdyqova, M.Toqtaǵazın, B.Jeksenbaı, V.Salahov, Q.Janahanov, tekserý komıssııasynyń tóraǵasy bolyp T.Chernega biraýyzdan saılandy.
Konferentsııa jumysyna QR Mádenıet jáne aqparat mınıstrliginiń Aqparat jáne muraǵat komıtetiniń tóraǵasy B.Qalıanbekov qatysyp, sóz sóıledi.
