"Bas redaktorlar klýby" QB N. Nazarbaevtyń prezıdenttik ókilettigin uzartý jónindegi respýblıkalyq referendým ótkizýdi qoldaıdy
ASTANA. 13 qańtar. QazAqparat /Jasulan Amanbaıuly/ - Qazaqstandyq 150-den astam buqaralyq aqparat quraldarynyń basshylary men bas redaktorlaryn biriktiretin «Bas redaktorlar klýby» qoǵamdyq birlestigi QR Prezıdenti Nursultan Nazarbaevtyń ókilettigin 2020 jylǵa deıin sozý jóninde referendým ótkizý týraly usynysty biraýyzdan qoldaýda.
Búgin Astanada osy máselege qatysty klýb músheleriniń jıyny ótip, onda Qazaqstan jýrnalıster qaýymdastyǵynyń ókilderi ózderiniń Qazaqstan azamattaryna úndeýin jarııalady. Klýb músheleriniń aıtýynsha, Referendým ótkizý ıdeıasy bir adamnyń emes, barsha Qazaqstan jurtynyń múddesi bolyp otyr.
«Bas redaktorlar klýby referendým ótkizý ıdeıasyna tolyqtaı qosylady. 5 mln. astam qazaqstandyq ózderiniń qandaı joldy tańdaıtyndyqtaryn anyq aıtyp otyrǵan tusta biz ol úderisten tys qala almaımyz. Qazaqstanda buqaralyq aqparat quraldarynyń damýyna qajetti barlyq jaǵdaılar qamtamasyz etilgen dep sanaımyz. Biz Qazaqstannyń alǵa qoıǵan baǵyty myzǵymaýy tıis dep esepteımiz jáne el basshylyǵynda Nursultan Nazarbaev Kóshbasshynyń qalǵanyn qalaımyz»,-dedi «Bas redaktorlar klýby» qoǵamdyq birlestiginiń prezıdenti, «OKO» gazetiniń bas redaktory Bolat Erejepov.
«Birlik, turaqtylyq, qalypty damý tárizdi bizdiń elimizdiń mańyzdy jetistikteriniń kepili ári ıdeıalyq turǵydan dem berýshisi tek Prezıdent bolyp tabylady.
«Bas redaktorlar klýby» qoǵamdyq birlestigi atynan bizder, ıaǵnı Qazaqstan jýrnalıster qaýymdastyǵynyń ókilderi, elimizdiń damýynyń belgilengen sara jolynan aýytqymaýynyń mánin jáne mańyzdylyǵyn túısine otyryp, Qazaqstannyń barlyq azamattaryn Qazaqstannyń Birinishi Prezıdenti Nursultan Nazarbaevtyń prezıdenttik ókilettigin uzartý jóninde respýblıkalyq referendým ótkizý týraly usynysty qoldaýǵa shaqyramyz»,-delingen klýbtyń Qazaqstan azamattaryna joldaǵan úndeýinde.
