Bas redaktorlar klýby elektoraldy naýqandy jarııalaý kezinde etıkalyq normalardy ustaný týraly Hartııany qoldaýǵa shaqyrady (FOTO)
ASTANA. QazAqparat - Búgin bas redaktorlar klýby Qazaqstan Respýblıkasy Prezıdentiniń kezekti tys saılaý boıynsha elektoraldy naýqandy jarııalaý kezinde etıkalyq normalardy ustaný týraly Hartııany qabyldap, BAQ boıynsha barlyq áriptesterin atalǵan qujatty qoldaýǵa shaqyrdy.
Hartııany qabyldaý rásimi Astana qalasyndaǵy QR Ulttyq Akademııalyq kitaphanasynda buqaralyq aqparat quraldarynyń basshylary men ókilderiniń kezdesýi barysynda ótti.
«Klýbtyń bastamasymen ázirlengen Hartııa kóptegen BAQ redaktsııalarynda talqylaný ústinde. Qazirdiń ózinde ony respýblıkalyq BAQ basylymdarynyń 10-ǵa jýyq redaktsııasy talqylaǵan. Osylaısha, atalǵan Hartııaǵa 350-ge jýyq áriptesimiz qol qoıdy. Men bul saıası mańyzdy kezeńde jaýapkershilikti sezinip otyrǵan barlyq áriptesterimiz qosylyp, oǵan qol qoıady dep oılaımyn», - dedi Bas redaktorlar klýbynyń prezıdenti Bıbigúl Jeksenbaı.
B.Jeksenbaı budan basqa, Hartııanyń maqsaty - bizdiń áriptesterimizdiń halyqaralyq standarttarǵa saı etıkalyq normalardy saqtaýy - «qara pıar» ustaný men reıtıngterdi qýalaýdan alshaq bolý, kúmándy aqparatty taratpaý bolyp tabylatynyn túsindirdi.
Bul Hartııa ózara yntymaqtasa jumys istep otyrǵan barlyq taraptardyń arasynda ózara syılastyqty, sondaı-aq múddelerdi esepke alý, joǵary saıası mádenıet, senimdi ári tolyq aqparat júıesin qurýdy kózdeıdi. Osyndaı talappen jýrnalıster saılaýdyń ádil jáne ashyq ótýin qamtamasyz etýge, barlyq kandıdattarǵa BAQ-qa teń quqyly qoljetimdilik berilýine septigin tıgize alady. Qabyldanǵan qujat QR Konstıtýtsııasy, QR saılaý, BAQ týraly zańnamasynyń negizinde qurylǵan.
«Atalǵan Hartııa - qandaı da bir tsenzýranyń engizilýi emes jáne ol jýrnalısterdiń jumysyna shekteý qoımaıdy. «QazAqparat» HAA ujymy bul qujatpen tanysyp ótken soń, oǵan tolyǵymen qol qoıdy. Qazaqstannyń barlyq jýrnalısterin Hartııaǵa qol qoıýǵa shaqyramyn, bul búkil álemge bizdiń birlesken kúsh-jigerimizdi - qazaqstandyq jýrnalısterdiń el ıgiligi úshin jumyla eńbek etetindigin kórsetedi», - dep atap ótti «QazAqparat» Halyqaralyq aqparattyq agenttiginiń bas dırektory Dáýren Dııarov.
Klýb otyrysyna «QazAqparat» Halyqaralyq aqparattyq agenttiginiń bas dırektory Dáýren Dııarov, «Egemen Qazaqstan» RG AQ-nyń prezıdenti Saýytbek Abdrahmanov, «Qazaqstan» RTRK basqarmasynyń tóraıymy Nurjan Muhamedjanova, «Kazahstanskaıa pravda» AQ basqarmasynyń tóraǵasy Aleksandr Tarakov jáne basqa da birqatar BAQ basshylary qatysyp, qabyldanyp otyrǵan qujattyń mańyzdylyǵy men ózderiniń ujymdarynyń atalǵan bastamany qoldaıtynyn atap ótti.
