Bas redaktorlar klýby aldaǵy saılaýǵa oraı áleýmettik saýalnamaǵa tapsyrys berdi
ASTANA. QazAqparat - Bas redaktorlar klýby aldaǵy Parlament Májilisiniń saılaýyna exit-poll zertteýine tapsyrys berdi. Bul týraly búgin Astanada ótken baspasóz máslıhatynda málim boldy.
Bas redaktorlar klýby Qazaqstannyń 200-den astam BAQ basshylary men bas redaktorlary kiretin qoǵamdyq birlestik retinde saılaý naýqanyna qatysýdy mańyzdy dep sanaıdy jáne saılaý kúni ekzıt-poll áleýmettik zertteýin júrgizýge tapsyrys berdi.
«Ózderińiz de bilesizder, Qazaqstandaǵy birqatar saılaýlarda bundaı tájirıbe qalyptasqan. Sondyqtan Bas redaktorlar klýby osyndaı tapsyrys berip otyr. Jalpy, bul zertteýler saılaýdyń aıqyndylyǵyn artady»,-dedi atalǵan klýbtyń prezıdenti Bıbigúl Jeksenbaı.
Atap aıtqanda bul zertteýdi «Medıa Konsýl» áleýmettik agenttigi júrgizedi. 20 naýryzda saılaý barysynda oblys ortalyqtarynda, shaǵyn qalalar men aýyldyq okrýgterde 225-ke jýyq daýys berý ýchaskesinde saýalnama júrgiziledi. Saýalnamany ótkizýge 250-ge jýyq suhbat alýshy jumyldyrylmaq, sondaı-aq olardyń jumysyn 16 óńirlik menedjer úılestiredi.
