Bas prokýrordyń tóraǵalyǵymen Qazaqstan quqyq qorǵaý organdary Úılestirý keńesiniń otyrysy ótti
ASTANA. Qazannyń 30-y. QazAqparat - Búgin Bas prokýror Qaırat Mámıdiń tóraǵalyǵymen elimizdiń quqyqtyq tártip organdary basshylary qatysqan Qazaqstan Respýblıkasy quqyq qorǵaý organdary Úılestirý keńesiniń kezekti otyrysy ótti,
dep habarlaıdy Bas prokýratýranyń baspasóz qyzmeti.
Otyrysta qylmystyq izge túsý jáne sot organdarynan jasyrynyp júrgen adamdardy izdestirý jónindegi ózara áreket etý jáne jalǵan aqsha jasaýshylyqpen kúresti kúsheıtý máseleleri qaraldy. Іzdestirý jumystarynyń jaı-kúıi jazadan qutylmaý qaǵıdasyn qamtamasyz etýine áser etedi.
Osyǵan oraı, Keńes músheleri bul baǵyttaǵy ózara is-qımyl deńgeıin kóterý jáne birlesip atqarǵan qyzmet nátıjelerin arttyrý máselelerin jan-jaqty talqylady.
Jedel-izdestirý sharalaryn júzege asyrý nátıjesinde aǵymdaǵy jyldyń 9 aıy ishinde 4 myńǵa jýyq qylmysker, sonyń ishinde, adam óltirý men qaraqshylyq shabýyl jasaǵany úshin 200-ge jýyq kúdikti, 40-tan astam uıymdasqan qylmystyq toptardyń basshylary men músheleri anyqtaldy.
Jaqynda vedomstvoaralyq jedel izdestirý toby kásipker Safındi urlap áketip, keıinnen óltirgenderi úshin sot sheshimimen jazaǵa tartylyp, uzaq ýaqyt memleketaralyq izdeýde júrgen Muhambedıarov pen Dosaevty ustady. 2004 jyly qasaqana kisi óltirgeni úshin memleketaralyq izdeýde júrgen Qazaqstannyń azamaty Mámbetov Ispanııa aýmaǵynda ustalyp, oǵan qatysty ekstradıtsııalyq sharalar bastaldy.
Sonymen qatar, osy suraq tóńiregindegi máseleler qylmyskerlerdiń tergeý men sot organdarynan jasyryný múmkindikterin azaıtýǵa baǵyttalǵan qosymsha sharalardy qabyldaýdy talap etedi.
Úılestirý keńesiniń otyrysynda aldyn alý jumystaryn jete uıymdastyrý, aıyptalýshylardyń tergeý men sottan jaltarýynyń aldyn alý úshin tıimdi jumys isteıtin tetik qurý qajettiligi ataldy. Ol úshin quqyqtyq negiz retinde jedel derektermen almasý úderisterin jaqsartýǵa septigin tıgizetin birlesken normatıvtik qujat qabyldaý máselesi sheshildi.
Otyrysqa qatysýshylar jalǵan aqsha jasaýshylyqpen kúres máselesin de qarady. Qylmystyń osy túrin anyqtaýdaǵy oń qarqyn atap kórsetildi.
Talqylaý nátıjeleri boıynsha atalǵan áleýmettik qylmystarǵa qarsy áreketter qoldaný is-sharalary kózdeldi. Sheteldik quqyq qorǵaý jáne arnaıy qyzmetterimen qyzmettik baılanystardy keńeıtý úshin QR Ekonomıkalyq qylmysqa jáne sybaılas jemqorlyqqa qarsy kúres agenttigine elimizdiń «Jalǵan aqsha jasaýmen kúres jónindegi Halyqaralyq Konventsııaǵa qosylý týraly» zańnama jobasyn Parlamentke engizý jumystaryn jedeldetý usynyldy, dep habarlaıdy Bas prokýratýranyń baspasóz qyzmeti.
