Bas prokýrordyń orynbasaryna pyshaq ótpeıtin nandy satyp jibergen

  ASTANA. QazAqparat - Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń búgingi otyrysynda Bas prokýrordyń orynbasary Andreı Kravchenko dúkennen qap-qatty nandy qalaı satyp alǵanyn aıtyp berdi, dep xabarlaıdy QazAqparat tilshisi.

Kravchenkonyń aıtýynsha, kásipkerlerdiń quqyǵyn qorǵaý qajet, biraq olardyń mindetterin de esten shyǵarmaǵan jón.

«Keshe ǵana menimen birge turatyn qarııa bir ónimdi aldy. Sóıtse, ony ótken jyly óndirgen. Qart adamnyń kózi kórmese de, men anyq kórip otyrmyn ǵoı. Osydan bir jarym aı buryn men ózim dúkennen nan satyp aldym. Onyń qattylyǵy sondaı, pyshaqpen de kese almadym. Sonda bul nandy op-ońaı sata saldy. Men tańǵaldym. Kásipkerler jaýapkershilikti sezbeı me? Sol sııaqty jemis-jıdektiń de sapasy syn kótermeıdi. Astananyń mańdaıaldy saýda ortalyǵy bolyp sanalatyn jerlerde kógerip ketken jemis-jıdekti satady. Masqara ǵoı! Men osyny ylǵı oılaımyn. Qalaı ózi? Qyzmet kórsetý sapasy qaıda? Іrip ketken sút, irimshik... Meıramxanalar men dámxanalarda kir óńezdenip ketken, temekiniń ıisi sińip ketken bólmeler, kınoteatrdaǵy kúl-qoqys... Otyrǵyń kelmeı ketedi. Qonaq úıler, taksı jáne taǵy basqa qoǵamdyq oryndardyń qyzmet kórsetý sapasyn aıta berseń, problemanyń ushy-qıyry kórinbeıdi», - deıdi Bas prokýrordyń orynbasary.

Onyń sózine qaraǵanda, kásipkerlerdiń quqyǵyn qorǵaýmen qatar tutynýshylardyń quqyǵyn da umytpaý qajet. Osy oraıda Kravchenko memlekettik organdar taýar men qyzmet kórsetý sapasyn tekserip úlgermese, jeke menshik aýdıtorlarǵa jol berý kerek dep sanaıdy.

Aıta keteıik, búgingi otyrys barysynda  Bas prokýratýra aqylǵa syımaıtyn keıbir tekseristerdi jarııalady. Prokýratýranyń departament basshysy Marat Seksembaevtyń aıtýynsha, jergilikti jerde kásipkerledi tekseretin organdar oıyna kelgendi istep, oryndaýǵa múldem kelmeıtin talaptardy qoıyp júr. Al "Atameken" palatasy kásipkerlerge qatysty myńdaǵan talaptardyń qysqartylǵanyn málimdedi.