Bas prokýrordyń orynbasary azamattardy «onlaın» rejıminde qabyldady
TANA. 27 shilde. QazAqparat /Qanat Mámetqazyuly/ - Aǵymdaǵy jyldyń 26 shildesinde QR Bas prokýrorynyń orynbasary Asqar Sekıshev azamattardy «onlaın» rejıminde qabyldaýdy júzege asyrdy.
Osyndaı formattaǵy azamattardy qabyldaý sharasy Bas prokýratýrada alǵash ret ótkizilip otyr. Bul týraly vedomstvonyń baspasóz qyzmetinen habarlandy.
«Azamattardyń shaǵymymen jumys isteý, olardyń konstıtýtsııalyq quqyn qorǵaý - prokýratýra organdarynyń mańyzdy baǵyttarynyń biri. Qadaǵalaý qyzmetin júzege asyrý barysynda zańnamanyń buzylýy týraly shaǵymdar qaralyp, azamattardyń buzylǵan quqyqtary men zańdy múddelerin qalpyna keltirý sharalary qabyldanady. Quqyq qorǵaýshylyq fýnktsııany júzege asyrý maqsatynda Bas prokýratýramen azamattardy, zańdy tulǵalardy qabyldaý aldyn ala jazba boıynsha bekitilgen kestege saı júrgiziledi. Al jaqynda, 26 shilde kúni Bas prokýrordyń orynbasary Asqar Sekıshev azamattardy «onlaın» rejıminde qabyldaýdy júzege asyrdy. Bundaı formattaǵy shara Bas prokýratýrada alǵash ret ótip otyr», - delingen baspasóz aıǵaǵynda.
Oblys prokýrorlarynyń orynbasarlary, prokýratýranyń óńirlik organdarynyń jaýapty qyzmetkerleri qatysqan «onlaın» qabyldaý barysynda, Bas prokýror orynbasarymen Almaty qalasynyń, Aqmola jáne Qostanaı oblystarynyń turǵyndary beınekonferentsııa arqyly baılanysty. Ótinish berýshilerdiń barlyq máseleleri muqııat tyńdalyp, ol boıynsha tyńǵylyqty zertteý júrgizý týraly naqty tapsyrmalar berildi. Buzylǵan quqyqtardy qalpyna keltirý jáne kinálilerdi zań sheńberinde jaýapqa tartý sekildi máseleler qozǵaldy.
«Zamanaýı tehnologııalardy paıdalaný azamattardyń ózderiniń suraqtaryn jedel ári tez arada joǵary deńgeıdegi basshylyqqa jetkizý múmkindigin týdyryp otyr. Bul rette ótinish berýshi de ózine qatysty jaýapty shapshań ala alady. Qabyldaýdyń bundaı formaty azamattar tarapynan oń baǵalanýda», - delingen baspasóz aıǵaǵynda.
