Bas Prokýrordyń narazylyǵy boıynsha sottalǵan azamattyń jazasyn óteý túri ózgertildi
ASTANA. 11 shilde. QazAqparat - Almaty oblysy Qaratal aýdandyq sotynyń 2010 jylǵy 5 qarashadaǵy úkimimen buryn urlyq jasaǵany úshin eki ret sottalǵan Mıhaıl Kotov iri mólsherde esirtki zattaryn satý maqsatynda zańsyz satyp alǵany jáne saqtaǵany úshin,
múlikterin tárkileý jolymen 7 jylǵa bas bostandyǵynan aıyrýǵa, jazasyn qatań rejimdegi túzeý mekemesinde óteýge sottalǵan.
Sottalǵannyń qylmystyq áreketine qatysty kinásiniń dáleldengenine jáne onyń áreketiniń durys kvalıfıkatsııa jasalǵanyna kúmán keltirmeı, túzeý mekemesiniń túrin taǵaıyndaýdyń negizdiligi týraly máseleni qoıa otyryp, Bas Prokýror Joǵarǵy sottyń atyna narazylyq keltirdi, dep habarlaıdy Bas prokýratýranyń baspasóz qyzmeti.
Narazylyqta kórsetilgendeı, Qylmystyq kodekstiń talaptaryna sáıkes Kotovtyń barlyq sottylyqtary alynǵany týraly sottyń dáıegi negizdi bolyp tabylady. Sonymen qatar, sot ony buryn bas bostandyǵynan aıyrý túrinde jazasyn ótegen adamǵa sanaı otyryp, qatań rejimdegi túzeý mekemesine jazasyn óteýdi durys taǵaıyndamaǵan.
Biraq qylmystyq zańnamaǵa sáıkes sottylyqtyń alynýyna baılanysty sottylyqpen baılanysty barlyq quqyqtyq saldarlar kúshin joǵaltady. Osyǵan oraı sottalýshy bas bostandyǵynan aıyrýǵa birinshi ret sottalyp otyrǵan tulǵadaı, jalpy rejimdegi túzeý mekemesinde jazasyn óteýi tıis.
Bas prokýratýra narazylyǵynyń dálelderimen kelise otyryp, Joǵarǵy sottyń qylmystyq ister boıynsha qadaǵalaý sot alqasy 2012 jylǵy 26 maýsymdaǵy óz qaýlysymen M.Kotovqa qatysty Qaratal aýdandyq sotynyń úkimin jáne Almaty oblystyq sotynyń apellıatsııalyq satysynyń qaýlysyn ózgertip, oǵan jalpy rejimdegi túzeý mekemesinde jazasyn óteýdi taǵaıyndady.
