Bas prokýrordyń narazylyǵy boıynsha memleketke magıstraldyq temirjoldar qaıtaryldy

ASTANA. QazAqparat – Bas prokýratýra Azamattyq protsestegi prokýrorlardyń róline qatysty málimetterdi jarııalady, dep habarlaıdy QazAqparat.

Bas prokýratýranyń baspasóz qyzmetiniń málimetterine qaraǵanda, sotta memlekettiń múddesine ókildik etý prokýratýra qyzmetiniń basym baǵyttarynyń biri bolyp tabylady. Ótken jyly prokýrorlar sottar qaraǵan 20 myńnan astam azamattyq jáne ákimshilik isterge qatysty.

Prokýrorlardyń ótinishhattary men narazylyqtary boıynsha 313 sot aktisi, onyń ishinde 60 – Bas prokýrordyń narazylyqtary negizinde zańǵa sáıkestendirildi. 34,9 mlrd teńgege memlekettiń múddesi qorǵaldy.

Prokýrorlardyń aktilerimen olıgopolııaǵa zańsyz berilgen múlik memleketke qaıtaryldy, bıznestiń múddeleri men azamattardyń quqyqtary qorǵaldy.

Máselen, Bas prokýrordyń 18 narazylyǵy boıynsha memleketke magıstraldyq temirjoldar qaıtaryldy, 21,1 mlrd teńgege bıýdjet shyǵyndarynyń aldy alyndy.