Bas prokýrordyń orynbasary Rýslan Jaqsylyqovtyń «ustalýy» týraly pikir bildirdi

ASTANA. KAZINFORM – Bas prokýrordyń orynbasary Áset Shyndalıev burynǵy Qorǵanys mınıstri Rýslan Jaqsylyqovtyń qamaýǵa alynǵany jóninde taraǵan málimetke qatysty pikir bildirdi.

Májilistiń jalpy otyrysy aldynda jýrnalıster Áset Shyndalıevten osy oqıǵa týraly suraǵan bolatyn. 

- Keshe Jaqsylyqovtyń ózi pikir bildirdi emes pe? Bizde qandaı da bir is nemese basqa da sharalar júrgizilgeni týraly eshqandaı málimet joq. Ondaı málimetter qolymda joq, - dedi ol.

Eske salsaq, 8 maýsymda Memleket basshysynyń Jarlyǵymen Qorǵanys mınıstri Rýslan Jaqsylyqov qyzmetinen ketken bolatyn. 

Al keshe keıbir BAQ pen telegram-arnalar onyń qamaýǵa alynǵany týraly aqparat taratyp, keıin eks-mınıstrdiń ózi ony teriske shyǵarǵan.