Bas prokýratýra: Bıshimbaevqa asqan qatygezdikpen kisi óltirý aıyby taǵylyp otyr

Bas prokýrordyń orynbasary Jandos Ómirálıev kúdikti Qýandyq Bıshimbaevtiń ustalǵan týysy týraly pikir bildirdi, dep habarlaıdy Kazinform

«Onyń týysqandyǵyn men naqty aıta almaımyn. Onyń aǵasy ma, inisi me degen aqparatty qazir bere almaımyn. Biraq týysqany ekeni naqty. Sol kúni, oqıǵa kezinde qasynda bolǵan. Biraq osy aýyr qylmystyń jasalǵany týraly polıtsııa organdaryna habarlamaǵan. Ol týraly Qylmystyq kodekstiń jeke baby bar. Tipti qylmysty jasyrýǵa tyrysqan», – dedi ol.

BAQ ókilderi marqum Saltanat Núkenovanyń óliminiń resmı sebebin naqtylap surady.

«Bul qylmystyq is boıynsha qazir barlyq tıisti saraptamalar taǵaıyndaldy. Búkil aqparat sizderge berildi ǵoı. Endi marqumnyń ólimine alyp kelgen bul, árıne, Q.Bıshimbaevtyń is áreketi ekeni, zańsyz is-áreketteriniń nátıjesi ekendigi sózsiz. Qylmystyq isti tergeý nátıjesi boıynsha saraptamalar daıyndalǵannan keıin tergeý organdary qosymsha habarlaıdy», – dedi Bas prokýrordyń orynbasary.

Sondaı-aq ol kúdiktiniń áýelde tergeý organdaryna jaýap berýden úzildi-kesildi bas tartqany týraly málimetke pikir bildirdi.

«Tergeý organdary birinshi kúni osy qylmysqa kináli Q.Bıshimbaev óziniń quqyqtaryn paıdalana otyryp, qandaı da bir maǵlumattar berýden bas tartyp otyrǵanyn aıtqanyn bilesizder. Bul birinshi kúnderi solaı bolǵan. Biraq qazir qylmystyq is júrip jatyr. Basqa da naqty derekter aıtylǵan bolsa, onyń suratý kerek», – dedi Jandos Ómirálıev.

Qýandyq Bıshimbaevqa asqan qatygezdikpen kisi óltirdi degen aıyp taǵylyp otyrǵany da aıtylyp ótti. 

«Bıshimbaevtiń ústinen asqan qatygezdikpen kisi óltirý baby boıynsha qylmystyq is qozǵalǵanyn bilesizder. Sondaı-aq ol ustalǵan bolatyn jáne onyń týysqany atalǵan qylmysty búrkemelep polıtsııaǵa habarlamaǵany úshin ızolıatorǵa alyndy», – dedi quzyrly organ ókili.