Bas prokýror júrgizýshilerge aıyppul týraly jalǵan qaýlylar taralyp jatqanyn eskertti

ASTANA. KAZINFORM — Bas prokýror Berik Asylov qazaqstandyqtarǵa eskertý jasap, AQSh pen Reseıde bastalǵan fıshıngtik shabýyldar týraly aıtty.

Onyń sózinshe, «aıyppul tóleý» siltemeleri bar fıshıngtik hattarǵa saq bolý qajet. Sebebi jalǵan hattar taratyp, azamattardyń qarajatyn ıemdenýge baǵyttalǵan qylmystyq áreketter beleń alyp keledi.

— Memleket basshysy óz Joldaýynda kıberqaýipsizdikti kúsheıtýdiń mańyzdylyǵyn erekshe atap ótti. Búgin QSjAEK-nyń Qylmystyq qaýip-qaterler jáne qoǵamdyq qaýipsizdiktiń táýekelderin boljaý ortalyǵynyń alǵashqy esebi tyńdaldy. Ortalyq jasandy ıntellekt elementterin qoldana otyryp, tsıfrlyq jobalardy iske asyrýǵa kirisken: «e-Ótinish» júıesindegi joldanymdardy taldaıdy, qylmystylyqty boljaıdy, Qazaqstanǵa taralýyna jol bermeý úshin álemdik qylmystyq qaýip-qaterlerdi baqylaıdy. Jýyrda dál osy Ortalyq avtokólik ıelerine baǵyttalǵan aýqymdy fıshıngtik shabýyl týraly aldyn ala eskertý jasady. Qaskúnemder jol júrisi qaǵıdalaryn buzǵany týraly «qaýlylary» tirkelgen jáne «aıyppul tóleý» siltemesi bar hattardy taratýda. Oǵan ótý qarajattyń urlanýyna jáne qurylǵylardyń zaqymdalýyna ákeledi. Alǵashqy shabýyldar AQSh pen RF-da tirkeldi, sol sebepten biz azamattar men memlekettik organdardy bar táýekelder týraly habardar etýdemiz. Adamdardyń quqyqtary men múddelerin qorǵaý — biz úshin birinshi kezektegi mindet. Memleket basshysynyń tapsyrmasy boıynsha prokýratýra kıberqylmys qaýip-qaterlerin der kezinde anyqtap, aldyn alý maqsatynda tsıfrlyq boljamdy odan ári júzege asyrady. Bul — qoǵam aldyndaǵy bizdiń jańa jaýapkershiligimiz, — dep jazdy bas prokýror H-tegi paraqshasynda.

Eske salsaq, budan buryn Bas prokýratýranyń Qylmystyq qaýip-qaterdiń jáne qoǵamdyq qaýipsizdiktiń táýekelderin boljaý ortalyǵy azamattardy álemde qarqyn alyp kele jatqan jańa kıberqaýip týraly eskertip, júrgizýshilerdi saq bolýǵa shaqyrǵan edi.