Bas prokýror jasóspirimder qylmysy kóbeıgen óńirlerdi atady

ASTANA. KAZINFORM — QR bas prokýrory Berik Asylov «Zań jáne Tártip» qaǵıdatyn iske asyrý boıynsha keńes ótkizdi. Bul týraly ol X áleýmettik jelisinde jazdy.

Onyń sózinshe, Aqtóbe, Atyraý, Pavlodar jáne basqa da óńirlerde jasóspirimder qylmysy kóbeıgen.

— «Zań jáne Tártip» qaǵıdatyn iske asyrý boıynsha keńes ótkizdim. Aqtóbe, Atyraý, Pavlodar jáne basqa da óńirlerde jasóspirimder qylmysy kóbeıip otyr. Profılaktıkalyq sharalardy kúsheıtýdi, antıbýllıng baǵdarlamalarynyń tıimdiligin zerdeleýdi tapsyrdym. Qoǵamdyq oryndardaǵy qaýipsizdikke erekshe nazar aýdardym. Qaýipti ýchaskelerdi beınekameralarmen jáne jaryqpen jabdyqtap, patrýldeýdi kúsheıtý qajet. Azamattar ózderin qorǵalǵan sezinýi tıis — sóz júzinde emes, is júzinde, — dep jazdy prokýror.

Sonymen qatar Berik Asylov jol-kólik oqıǵalarynyń kúrt ósýi alańdatatatynyn aıtty: bir jylda +67%, jaraqat alǵandar +79%.

— Atyraý, Qostanaı, Aktóbe, Jetisý oblystarynda jaǵdaı kúrdeli. Apattardyń 72%-y trassalarda. Júrgizýshilerdiń eńbek tártibin baqylaý, bala tasymaldaý erejeleriniń saqtalýyn qamtamasyz etý tapsyryldy Halyqaralyq sarapshylardyń qatysýymen Talǵar men Rýdnyı qalalarynda qaýipsizdik máselelerin taldaıtyn pılottyq joba iske qosylady. Óńirlerdiń krımınologııalyq pasporttaryn ázirleý, ýákiletti organdarmen birlesip mektepterde zań mádenıetin ilgeriletý tapsyryldy, — dep túıindedi QR bas prokýrory.

Osyǵan deıin Bas prokýratýra QFF-nyń burynǵy basshylyǵy kezindegi zań buzýshylyqtardy anyqtaǵanyn jazǵan edik.