Bas prokýror: Jalaqy keshiktirilgeni úshin kásiporyndy emes, basshyny jazalaý kerek
«Eńbek qatynastary. Búginde 8 myń 400 jumysshy jalaqylaryn ala almaı otyr. Qaryz 1,7 mlrd. teńge. Olardyń januıalary qıyn jaǵdaıda qalyp otyr. Qaryzdyń basym bóligi Aqmola, Shyǵys Qazaqstan jáne Batys Qazaqstan oblystarynda. Prokýrorlar bul máseleden tys qalyp otyrǵan joq. Jumysberýshilermen birge ony sheshýdiń joldaryn qarastyrýda. Biraq, bizge nátıje kerek», - dedi ol búgin Bas prokýratýranyń jartyjyldyń qorytyndysyn shyǵarý kezinde.
Mysaly, «Gefest» JShS prokýratýra aralasýynan keıin óz ónimderin satyp alatyn tutynýshyny tapty, osylaısha barlyq paıda jalaqy tóleýge baǵyttaldy. Myńnan astam jumysshy 160 mln. teńge jalaqylaryn aldy.
«Qaryzdyń qısyndy sebepteri de bolatyn kezder az emes. Daǵdarys, óndiristiń tómendeýi. Degenmen, bereshektiń tórtten biri jumys berýshilerdiń kesirinen oryn alatyny anyqtaldy. Aqsha olarda boldy, biraq basqaǵa shyǵyndap jibergen. Ol úshin qylmystyq ta, ákimshilik te jaýapkershilik bar. Osyny rettep alaıyq. Kásiporynǵa ákimshilik tártip boıynsha aıyppul salynady, al onyń ózinde jalaqy boıynsha qaryzy bastan asady. Nátıjesinde, aıyppuldy jalaqydan buryn ótep tastaıdy. Biraq jazany kásiporynǵa emes, basshyǵa qoldaný kerek qoı. Ákimshilik zańbuzýshylyqtar týraly kodekske osyny engizý qajet. Biz ony bastama etip kóteremiz», - dedi J.Asanov.
