Bas prokýror úılenemin deýshilerge arnalǵan mindetti kýrsty engizýdi usyndy

ASTANA. QazAqparat - QR Bas prokýrory Jaqyp Asanovtyń oıynsha, atalǵan kýrs kezinde jastar otbasynyń qundylyqtaryn jete túsinýi kerek. Al kýrstan ótpegenderge nekege turýǵa jol berilmegen jón. Ondaı tájirıbe damyǵan memleketterde de bar, dep xabarlaıdy QazAqparat tilshisi.

"Súıdim-kúıdim degen eki jas kóp uzamaı úılenedi. Basynda tamasha, keıin kóńilderi qalyp, daý-janjalǵa, tipti qol jumsaýǵa barady. Arty sot, balalardy bólip alady, qudalardyń arasy ashylady. Múlikke talas bastalady. Búginde ajyrasý jaǵynan Qazaqstan alǵashqy jaǵymsyz ondyqtyń ishine kiredi. Basty sebep, otbasy degen ne, baqytty otbasynyń qupııasy nede ekenin jastar bile bermeıdi. Sondyqtan úılenemin deýshilerge arnalǵan mindetti kýrs, osyny erekshe atap ótemin, mindetti kýrs bolýy qajet. Odan ótpese, neke bolmaýy kerek. Mundaı tájirıbe biraz elderde bar. Mysaly, Saýd Arabııasynda, Malaızııada, Italııada, Latvııada, aıta berse, ondaı tizimniń shegi joq", - dedi Asanov búgin turmystyq zorlyq-zombylyqqa arnalǵan jıynda.

Onyń aıtýynsha, atalǵan kýrstan mektep oqýshylary men úılemin deıtin jastar ótýi tıis.

Aıta keteıik, óz baıandamasyn tolyǵymen memlekettik tilde jasaǵan Jaqyp Asanov óz ómirinen bir oqıǵa jaıynda baıandap berdi. Budan bólek, naqty statıstıkany keltirdi. Elimizde áıel adamdarǵa qatysty qylmystardyń sany 90 paıyzǵa ósti. Árbir úshinshi qylmys otbasy jaǵdaıynda boldy. Ótken jyly 36 áıel jáne bir bala qaıtys bolsa, 2 481 áıel men 851 bala zorlyq-zombylyqtyń qurbanyna aınaldy. 742 áıel men kámelettik jasqa tolmaǵan 175 jas óz-ózine qol saldy.

Bas prokýrordyń oıynsha, mektepte qajetsiz pánderdiń ornyna ómirge paıdaly bilim berý kerek.