Bas prokýror táýlik boıy jumys isteıtin sheteldik sottardy úlgi etti
«Jyldamdatylǵan protseske toqtalatyn bolsaq, máselen, qylmysker ustalyp, kinásin moıyndady. Osy rette kýágerler de bar delik. Degenmen de, qylmystyq is 15 kún boıy tergeledi, oǵan taǵy qosymsha 3 kún prokýror isti zertteýge alady. Sot - 20 táýlikke deıin. Nátıjesinde, bir iske 40 kún ýaqyt ketedi. Osy merzim aralyǵynda jábirlenýshiler, kýágerler, kúdiktiler árbir esikti aralap júredi. Bundaı ister ondaǵan myń bolyp esepteledi. Sansyz tergeýler oryn alady, dálizde bosqa kútýmen ótetin ýaqyttar baıqalady. Osynyń barlyǵy adamdardyń narazylyǵyn týdyratyny anyq»,-dedi QR Bas prokýrory Jaqyp Asanov vedomstvonyń alqa májilisinde.
Osy oraıda ol damyǵan elderdiń tájirıbesine toqtaldy. Eger de barlyǵy anyq bolsa, onda tutqyndalǵan adamdy birden sotqa alyp barady.
«Sot táýlik boıy jumys isteıdi. Sol jerde prokýror da, qorǵaýshy da bar. Cot úkimi 3 táýliktiń úshinde jarııa bolady. Osylaısha, qylmystyq isterdiń 70 paıyzǵa deıingisi sheshiledi. Barlyq sharalar jyldam atqarylyp, bul óz kezeginde sybaılas jemqorlyqqa tosqaýyl bolady»,-dedi Bas prokýror.