Bas prokýror ShQO-daǵy orta mektepterdiń birindegi erekshe bastama týraly aıtty

ASTANA. KAZINFORM — 2025 jyldyń qańtarynda Shyǵys Qazaqstan oblysynyń Glýbokov aýdanyna qarasty iri orta mektepterdiń birinde erekshe bastama qolǵa alyndy, dep habarlady Bas prokýror Berik Asylov H jelisinde.

Asylovtyń sózinshe, aýdandyq prokýratýra bilim bólimi men mektep ákimshiliginiń belsendi qoldaýymen ómirlik qıyndyqqa tap bolǵan jasóspirimderdi óz qamqorlyǵyna aldy. Osylaısha «Kúsh — birlikte» dep atalatyn kóshbasshylar klýby dúnıege keldi.

— Eń bastysy — 7–8-synyptyń 23 oqýshysyna jańa tynys ashyldy. Kúdiktenip qaraǵannan góri, senim artty. Túzetýge tyrysqannan góri, qoldaý kórsetti. Olardy sportqa, shyǵarmashylyqqa, birlesken isterge jumyldyrdy. Nátıjesinde úsh aıdyń ishinde tártip buzýshylyqtyń ornyna — jetistikter, nemquraıdylyqtyń ornyna — belsendilik, tuıyqtyqtyń ornyna — sahnada jarqyraǵan óner keldi, — dep atap ótti ol.

Bas prokýror taǵy bir aıryqsha jaıt — prokýrordyń qatysýy resmı jıyndarmen shektelip qalmaýy ekenin aıtty.

— Ol negizgi jumysynan qoly bosasa boldy, mektepke baryp, balalarmen áńgimelesti, tennıs jáne basqa sport túrlerin birge oınady, ómirlik tájirıbesimen bólisti. Balǵyn júrekterge dál osyndaı qarapaıym da shynaıy sátterdiń áseri mol boldy. Olar rasymen senimge ıe ekenin, jandarynda kómek qolyn sozýǵa daıar eresekter bar ekenin uǵyndy, — dep jazdy Berik Asylov.

Vedomstvo basshysy bul bastamanyń sátti júzege asýyna mektep dırektory men muǵalimderdiń qosqan úlesi ólsheýsiz ekenin alǵa tartty.

— Balalar úshin qolaıly orta jasalyp, ózin qajetti, estigen, qabyldanǵan kúıde sezinýine bar jaǵdaı jasaldy. Oqýshylar óz kúshterimen «Naýryz — Meıirim men birliktiń merekesi» atty mekteptik sharany uıymdastyryp, ár jasóspirimge qajetti ınvestıtsııa. Qazaqstan Prezıdenti Qasym-Jomart Toqaevtyń sózine súıensek: «Jastar — jarqyn bolashaqqa degen barlyq úmitimizdiń beınesi». Mine, osyndaı jańasha bastamalar arta tússe eken deımiz. Óıtkeni qýatty memleket — eń aldymen senimge ıe, syıly jáne daýsy estilgen jas býynnan bastaý alady, — dep túıindedi Asylov.

Osyǵan deıin bas prokýror Berik Asylov elimizde jol apaty kóbeıgenin aıtty.