Bas prokýror Prezıdentke: 3 mln-nan astam azamattyń quqyǵyn qorǵadyq
Aqordanyń Feısbýktegi paraqshasynda taratylǵan málimetke sáıkes, kezdesý barysynda Nursultan Nazarbaevqa elimizdegi quqyq qorǵaý organdarynyń qyzmeti jáne buǵan deıin júktelgen tapsyrmalardyń oryndalýy jóninde esep berildi.
«Bas prokýratýraǵa eń joǵary dárejede baqylaý sharýasy berilgen, barlyq jaǵynan. Zańnyń ádiletti bolýy úshin birneshe sharany qoldadyq, zańdardy qabyldadyq, sot júıesin túzedik. Polıtsııa týraly zań qabyldadyq. Endi solardyń barlyǵynyń naqty oryndalýy Bas prokýrordyń quzyrynda», - dep atap ótti Nursultan Nazarbaev.
Óz kezeginde Qaırat Qojamjarov aǵymdaǵy jyldyń 7 aıynda elimizdiń quqyq qorǵaý salasynda biraz jumys atqarylǵanyn aıtty.
«Sony ózińizge baıandaýǵa kelip otyrmyn. Elimizdi saıası-qoǵamdyq ahýal turaqty. Prokýratýra organdary zńdylyqty jáne quqyqtyq tártipti saqtaýda júıeli sharalar qoldanyp jatyr. Azamattardyń quqyǵyn qorǵaý salasyna jarty jyldyqtyń ishinde 5-6 tekserý júrgizdik. Onyń ishinde eńbek, jer qatynastary, tarıfter,jumyspen qamtamasyz etý máseleleri bar. Nátıjesinde osy ýaqytta deıin prokýratýra organdary úsh mıllıonnan astam azamatymyzdyń quqyǵyn qorǵady. Máselen, tarıfterge keler bolsaq, jeti óńirde tarıfterdiń deńgeıin túsirip, 1,5 mıllıon adamǵa artyq tólegen aqshalardy qaıtarý boıynsha sharalar qoldanyp jatyrmyz», - dedi Bas prokýror.
Osy oraıda Memleket basshysy Bas prokýrordan onyń qandaı tarıfter ekenin surady.
«Birinshi - elektr tarıfteri. Sebebi aralarynda fırmalar óte kóp, qosyp qoıǵan. Olardyń arasynda laýazymdy adamdardyń da, monopolısterdiń de fırmalary bar. Solardyń barlyǵyn anyqtap, syrtqa shyǵaryp jatyrmyz. Quqyqtyq baǵa berýdemiz»,- dedi Qaırat Qojamjarov.
«Eger de ózin monopolıst dep sanaıtyn bolsa, onda ol isteıtin jumysyna ınvestıtsııa salýy kerek. Tarıfter arqyly qarajat taýyp, aqshasyn salyp, turǵyn úılerdiń, turǵyn úı-kommýnaldyq sharýashylyǵynyń jumystaryn jóndeýi kerek», - dep eskertti Nursultan Nazarbaev.
Sonymen qatar, Bas prokýror QR Prezıdentiniń tapsyrmasymen qylmystyq protsesti jańǵyrtý jumystary jalǵasyp jatqanyn, qylmys deńgeıi jalpy elimizde 10 paıyzǵa tómendegenin aıtty.
«Qazirgi ýaqytta adamdar burynǵyǵa qaraǵanda 30 paıyz az qamalady. Mysaly, bıyl sot 12 myń adamǵa úkim shyǵaryp, sonyń 4 myńy ǵana bas bostandyǵynan aıryldy», - dedi ol.
