Bas prokýror lańkestik qylmystyq áreketteri úshin sottalǵandardy negizsiz aqtaýǵa narazylyq keltirdi
ASTANA. 17 shilde. QazAqparat - Bas prokýratýranyń arnaıy prokýrorlar toby ótken jyly jazda Aqtóbe qalasynda lańkestik qylmystar jasady dep aıyptalǵan K.Ahmetovtiń tobyna qatysty qylmystyq isti tergedi.
Bul aqparatty atalǵan vedomstvonyń baspasóz qyzmeti taratyp otyr.
Aqtóbe oblystyq qylmystyq ister boıynsha mamandandyrylǵan aýdanaralyq sotynyń 2011 jylǵy 30 qarashadaǵy úkimimen top músheleri K.Alpamysov jáne A.Sattarov qarý-jaraqty zańsyz alý jáne saqtaý, jasalǵan asa aýyr qylmysty habarlamaýǵa kináli dep tanylyp, jalpy rejimdegi túzetý kolonııasynda 5 jylǵa bas bostandyǵynan aıyrýǵa sottalǵan. Olardyń áreketterindegi qylmys quramynyń dáleldenbeýine baılanysty atalǵan tulǵalar Qylmystyq kodekstiń 233-babynyń 4-bóligimen (lańkestik), 233-2-babynyń 2-bóligimen (lańkestik toptyń qyzmetine qatysý) aqtalǵan. J.Nurtazın top bolyp qarý-jaraqty zańsyz alǵany jáne saqtaǵany úshin 4 jylǵa bas bostandyǵynan aıyrýǵa sottalyp, lańkestik jáne lańkestik toptyń qyzmetine qatysý baptarymen aqtalǵan.
Osy úkimmen top músheleri K.Ahmetov, T.Rahmetov, T.Satybaldıev, A.Ádilshın, M.Kalýger lańkestik qylmystar jasaǵandary úshin ártúrli jazalaý merzimderine sottalǵan.
»Alpamysov, Sattarov, Nurtazınniń áreketterin negizsiz aqtaý jáne qaıta kvalıfıkatsııalaýǵa qatysty Aqtóbe oblysy prokýratýrasynyń engizgen apellıatsııalyq narazylyǵyn oblystyq sottyń apellıatsııalyq satysy qanaǵattandyrýsyz qaldyrdy. Oblys prokýratýrasy sot aktilerine narazylyq keltirý týraly Bas prokýratýraǵa júgindi jáne ol joǵary qadaǵalaý organynda qoldaý tapty. Bas prokýror Joǵarǵy sotqa isti qaıta qaraý týraly narazylyq engizdi», delingen aqparatynda.
Vedomstvonyń atap ótýinshe, 2012 jylǵy 10 shildedegi Joǵarǵy sottyń qylmystyq ister boıynsha sot qadaǵalaý alqasynyń qaýlysymen narazylyq dálelderi negizdi dep tanylyp, tolyqtaı qanaǵattandyryldy. Alpamysov, Sattarov, Nurtazınge qatysty sot aktileriniń kúshi joıyldy jáne sol sotqa ózge quramdaǵy jańa sot qaraýyna jiberildi.
