Bas prokýror: Quqyq qorǵaý organdary «eski aýrýdan» arylady

ASTANA. QazAqparat - Quqyqqorǵaý organdaryn tsıfrlandyrý saladaǵy qatelikterge jol bermeıtin bolady. Bul týraly búgin Parlament Májilisiniń jalpy otyrysynda QR Bas prokýrory Jaqyp Asanov málim etti, dep habarlaıdy QazAqparat.

Bas prokýror palata depýtattary aldynda «Qazaqstan Respýblıkasynyń keıbir zańnamalyq aktilerine quqyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasady. 

«Bizde quqyq qorǵaý organdarynda baıaǵydan kele jatqan eski aýrýymyz bar. Ózimizdi qylmystyq istiń qojaıyny dep sanaımyz. Sosyn, qylmysqa tartylyp jatqan adamnyń taǵdyry óz qolymyzda dep keýdemizdi uramyz. Shynyn aıtqanda, bul Keńes Odaǵynan kele jatqan kózqaras, qanymyzǵa sińgen ádet. Al endi osy aýrýdy qalaı emdeý kerek? Bul turǵyda osynyń sheshimin Elbasy óziniń Joldaýynda bizge atap kórsetken bolatyn», - dedi Jaqyp Asanov.

Osy oraıda qylmystyq protsesti tsıfrlyq formatqa aýystyrý kózdelgen.

«Biz bul baǵytta tıisti jumystardy atqaryp jatyrmyz. Elbasy tapsyrmasymen biraz ІT-mamandaryn prokýratýraǵa aldyq. Bıýdjetten qosymsha qarjy surap jatqan joqpyz. Birqatar ІT-baǵdarlamalardy jasadyq, qazir alty oblysta qanatqaqty joba iske asyrylýda. Sonyń aıasynda 200-deı sanktsııa sottardan tikeleı elektrondyq formatta alynady. Buryn tergeýshi prokýror men sottyń arasynda 3-4 kún sandalyp júrse, qazir óz kabınetinde eki saǵattyń ishinde alady», - dedi ol.

J. Asanovtyń sózine qaraǵanda, tsıfrlandyrý nátıjesinde barlyq protsess prokýror, sot úshin aıqyn kórinip turady. Eger tergeýshi tarapynan qatelik oryn alsa, olar ony dereý joıýǵa mindetti bolady.