Bas prokýror Qaırat Mámıdiń tóraǵalyǵymen quqyq qorǵaý organdary Úılestirý keńesiniń májilisi ótti
amyrdyń 5-i. QazAqparat /Aıdar Ospanalıev/ - Búgin Bas prokýror Qaırat Mámıdiń tóraǵalyq etýimen Qazaqstan Respýblıkasy quqyq qorǵaý organdarynyń Úılestirý keńesiniń kezekti májilisi ótti,
dep habarlaıdy QazAqparat.
Onda kontrabandamen kúres máseleleri talqylandy. Májilis barysynda aıtylǵandardan málim bolǵanyndaı, qazir Qazaqstannyń Reseı jáne Belarýs elderimen Kedendik odaqqa kirýi aıasynda ekonomıkalyq qaýipsizdikti onan ári kúsheıtý jáne elimizge taýarlardy zańsyz tasymaldaýdyń jolyn kesý máseleleriniń ózektiligi arta túsýde. Osyǵan oraı, quzyrly organdar men vedomstvolar memlekettik shekaralardy bekitý jáne kedendik baqylaýdy kúsheıtý jumystaryn belsendi júrgize bastady.
Úılestirý keńesiniń músheleri ýákiletti jáne quqyq qorǵaý organdarynyń osy másele boıynsha ózara is-qımyl deńgeıine tutastaı alǵanda oń baǵa berdi. Sonymen qatar, kontrabandamen kúrestiń tıimdiligin odan ári arttyrý, shekarany ınjenerlik nyǵaıtý jáne ótkizý beketterin tehnıkalyq jabdyqtaý boıynsha jumystardyń belsendiligin kúsheıtip, júk tasymalyn júzege asyratyn uıymdarmen úılesimdi is-qımyl ornatýdyń mańyzdylyǵy atap kórsetildi.
Májilis barysynda Bas prokýror Qyrǵyzstanmen shekaradaǵy ınjenerlik bekitý qondyrǵylarynyń qurylysyn aǵymdaǵy jyldyń sońyna deıin aıaqtaý qajettiligine nazar aýdaryp, júkterdi kedendik rásimdeý barysynda sybaılas jemqorlyq áreketteriniń aldyn alý boıynsha túbegeıli sharalar qabyldaý qajettigin atap kórsetti.
Májilis sońynda keden salasyndaǵy quqyq buzýshylyqtarǵa qarsy kúres sharalaryn odan ári jetildirýge baǵyttalǵan sheshimder qabyldandy.
