Bas prokýror: Qańtar oqıǵasynda 800-den astam vıdeokamera qylmysty jasyrý úshin qıratylǵan

NUR-SULTAN. QazAqparat – Qańtar oqıǵasy kezinde tártipsizdikke qatysqandar Almatyda jáne basqa da iri qalalarda qylmysty jasyrý úshin 800-den astam vıdeokamerany qıratty.

Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy QazAqparat tilshisi.

«Almatyda jáne basqa da iri qalalarda qylmysty jasyrý úshin 800-den astam vıdeokamerany qıratqan. Basyp alynǵan qarýdy, azyq-túlikti jáne aýyz sýdy, jetkizý uıymdastyrylǵan. Taksı, júk kólikteri men avtobýstardyń júrgizýshilerin kósheni jaýyp tastaýǵa májbúrledi. ıAǵnı beıbit azamattardy «tiri qalqan» retinde paıdalanǵan. Arnaıy avtokólikter men basqa da júk mashınalaryn taran retinde paıdalandy», - dedi Berik Asylov.

Budan buryn habarlanǵandaı, Bas prokýror 11 aımaqta agressıvti toptar zorlyq-zombylyq satysyna ótkenin aıtty.

«3-shi, 4-shi jáne 5-shi qańtarda Memleket basshysy demonstranttarǵa úndeý joldap, zańdy saqtaýǵa jáne destrýktıvti kúshterdiń arandatýyna boı bermeýge shaqyrdy. Alaıda, birneshe márte sabyr saqtaýǵa shaqyrýǵa qaramastan, qylmystyq jáne radıkaldy elementter belsendi de qatań áreketterge kóshti. 4-shi jáne 5-shi qańtarda azamattar jıyny agressıvti topqa aınalyp, 11 aımaqta zorlyq-zombylyq satysyna ótti», - dedi B. Asylov.