Bas prokýror energııa salasyndaǵy zań buzýshylyqtardy atady
Bas prokýratýranyń alqa otyrysynda Memleket basshysy Joldaýynda turǵyn úı-kommýnaldyq sharýashylyq jáne tabıǵı monopolııalar kórsetetin qyzmetterdiń aqysyn ósirmeýge qatysty sharalar keshenin qabyldaý tapsyrylǵany atap ótildi.
«Sonymen qatar, Prezıdent monopolısterdiń qyzmetine tıimdi monıtorıng jasaýǵa ári baǵa belgileý kezinde ashyqtyqty qamtamasyz etýdi talap etti. Tarıf máselesi halyq úshin óte mańyzdy, sebebi otbasylyq bıýdjetten kommýnaldyq shyǵyndarǵa aıtarlyqtaı qarjy jumsalady», - dedi Qojamjarov.
Onyń sózine qaraǵanda, sońǵy bes jylda jylý energııasyna tarıfter 2 esege, al elektr energııasyna úshten bir bólikke ósti. Osyǵan baılanysty Prezıdent tapsyrmasy boıynsha Bas prokýratýra el aýmaǵynda aýqymdy tekserý júrgizdi.
«Bul turǵyda kóptegen qarjylyq buzýshylyqtar anyqtaldy. Monopolıster tarapynan ózindik shyǵyndaryn qasaqana kóterý jáne 29 mlrd teńge somasynda olardyń kúmándi kelisimderi belgili boldy», dedi Bas prokýror.
Osy oraıda ol tarıf quramynda qyzmetkerlerge arnalǵan bonýstar men syılyqaqylar negizsiz qamtylyp otyrǵanyn atap ótti. Budan bólek, shyǵystardy arttyrý maqsatynda ádeıi túrli úlestes kásiporyndar, onyń ishinde joǵary baǵamen jóndeý jumystaryn júrgizýge ári jabdyqtar satyp alýǵa servıstik kompanııalar qurylǵan.
«Budan keıin zańsyz alynǵan tabys tıisti kompanııalar arqyly shyǵarylyp otyrǵan. Osy qoldan jasalǵan shyǵyndar halyqtyń esebinen jabyldy, al monopolıster mundaı áreketten tartynbastan, dáýlet jınap keldi. Qalyptasqan ahýaldyń negizgi sebepteriniń biri - ol tıisti memlekettik qadaǵalaýdyń bolmaýy. Bul rette Ulttyq ekonomıka mınıstrligi men Energetıka mınıstrligi tarapynan baqylaý sharalary aıqyn emes. Monopolıster shyǵystaryn naqty anyqtaý boıynsha ózara jáne salyq organdarymen arada tıisti áreketterdiń kelistiligi joq. Eger de úsh jylda ókiletti organdar elektr energııasy boıynsha tutynýshylarǵa 3,7 mlrd teńge ótep berse, prokýrorlar tek bir tekserýdiń kezinde segiz ese somaǵa artyq zań buzýshylyqtardy anyqtady», - dedi Qaırat Qojamjarov.
Osynyń aldynda Qazaqstannyń keıbir óńirlerinde jylý berý tarıfi ózgergendigi týraly jazyldy.
