Bas prokýror BAÁ-niń Federaldyq prokýrorymen ózara is-qımyldy nyǵaıtý máselesin talqylady

ASTANA. QazAqparat - 2018 jylǵy 26 naýryzdan beri Qazaqstan Respýblıkasynyń Bas Prokýrory Qaırat Qojamjarov bastaǵan qazaqstandyq delegatsııa Birikken Arab Ámirlikterinde resmı issaparda júr. Bul týraly Bas prokýratýranyń baspasóz qyzmeti habarlady.

Baspasóz málimetterine qaraǵanda, Qaırat Qojamjarov BAÁ Federaldyq Prokýrory myrza Al-Shamsımen kezdesken.

Áriptester quqyqtyq yntymaqtastyqty nyǵaıtý jáne sharttyq-quqyqtyq bazany keńeıtý máselelerin talqylady.

«Jasalǵan quqyqtyq kómek týraly kelisimder sheńberinde bizdiń memleketter arasynda tıimdi yntymaqtastyq kúsheıtildi. Búgingi kezdesýimiz qylmyskerlerdi ekstradıtsııalaý jáne urlanǵan qarajatty qaıtarý suraqtary boıynsha ekijaqty qarym-qatynastarǵa jańa serpin beredi»,-dedi Qaırat Qojamjarov sózinde.

Qazaqstanǵa sońǵy 3 jylda BAÁ-den izdeýde júrgen 10 adam ekstradıtsııalandy.

Sonymen qatar, tkezdesý barysynda terrorızm jáne ekstremızm, transulttyq qylmysqa qarsy kúres salasyndaǵy yntymaqtastyq máseleleri qaraldy.

Birikken Arab Ámirlikteri osy máseleler boıynsha Qazaqstan úshin belsendi seriktes bolyp tabylady. 2013-2017 jyldar aralyǵynda birlesken sharalar qabyldaýdyń arqasynda BAÁ terrıtorııasynda Qazaqstan azamattarynan turatyn bir top IShIM (IGIL) emıssarlary jáne kómekshileri áshkerelendi.

Kezdesý sońynda qazaqstandyq delegatsııa músheleri sheteldik áriptesterine alǵys bildirip, quqyqtyq salada ózara is-qımyldy odan ári keńeıtý qajettigin aıtty.