Bas prokýror azaptaýlarǵa tosqaýyl qoıý jumystary jaıynda túsinik berdi

ASTANA. QazAqparat – Búgin Parlament Májilisiniń jalpy otyrysynda elimizdegi kolonııalarda azaptaýlarǵa tosqaýyl qoıý baǵytynda prokýrorlar tıisti baqylaý júrgizip jatqany aıtyldy, dep habarlaıdy QazAqparat tilshisi.

Depýtat Darhan Myńbaı elimizde azaptaýlarǵa jol bermeý baǵytynda qandaı sharalar qabyldanǵanyn surady.

Osy oraıda Bas prokýror Berik Asylov arnaıy prokýrorlar polıtsııa men Ulttyq qaýipsizdik komıtetiniń qyzmetkerine qatysty isti tergegenin aıtty.

«Azaptaý týraly qylmystyq isterdiń basym bóligin Sybaılas jemqorlyqqa qarsy is-qımyl agenttigi tergedi. Prokýrorlar neǵurlym rezonansty jáne adam ólimine qatysty isterdi qamtydy. Arnaıy prokýrorlar polıtsııa men Ulttyq qaýipsizdik komıtetiniń 34 qyzmetkerine qatysty isti tergedi. Almaty oblysynyń polıtsııa ǵımaratynda 24 adamdy azaptaý faktileri týraly isti sotqa joldadyq. Jalpy, biz qaraǵan azaptaý isteri boıynsha aıyptaýdan bas tartqan derekter bolmady. Barlyǵyn tergep, sotqa joldap otyrmyz», - dedi B. Asylov.

Onyń aıtýynsha, qazirgi kezde elimizdegi kolonııalarda beınebaqylaý júıesi ornatylǵan. Osy júıe arqyly prokýrorlar tıisti baqylaý júrgize alady.

«Tergeý qalaı júrip jatqanyn, sottalǵandardyń is-qımylyn kórip otyrmyz», - dedi Bas prokýror.

Óz kezeginde QR Іshki ister mınıstri Marat Ahmetjanov azaptaýlarǵa jol bermes úshin vedomstvo tıisti sharalar qabyldap jatqanyn aıtty.

«Ár polıtsııa qyzmetkerinde beınebaqylaý jetony bar. Sonymen qatar, bizdiń organdardaǵy aýqymdy jumystar jaıynda aldaǵy ýaqytta depýtattarǵa tolyq baıandap beremiz. Qazir jeke quram azaptaý sekildi teris áreketter polıtsııa qyzmetine saı emes dep sanaıdy», - dedi mınıstr.

Budan buryn habarlanǵandaı, Bas prokýror B. Asylov qańtardaǵy azaptaýlar týraly shaǵymdar boıynsha 329 qylmystyq is qozǵalǵanyn aıtty.