Bas prokýror Almatynyń bıznes ókilderimen kezdesti
ASTANA. QazAqparat - Bas prokýror Jaqyp Asanov Almaty qalasyna jumys sapary sheńberinde aımaq kásipkerlerimen kezdesti, dep habarlady QazAqparatqa vedomstvonyń baspasóz qyzmetinen.
Kezdesýge sondaı-aq Almaty qalasynyń ákimi Baýyrjan Baıbek, Almaty qalasynyń prokýrory Ǵabıt Mırazov, sondaı-aq ulttyq kompanııalardyń, damý ınstıtýttarynyń, ekinshi deńgeıli bankterdiń, Almaty kásipkerler palatasynyń ókilderi men aımaqtyq keńes músheleri, Indýstrıalızatsııalaý kartasy, ındýstrıaldyq aımaq qatysýshylary qatysty.
Bıznes-jurtshylyq aldynda sóz sóılegen Bas prokýror Almatynyń el ekonomıkasynyń besten bir bóligin jáne respýblıkalyq bıýdjet túsiminiń úshten birin quraıtyndyǵyn erekshe atap ótti. Qazaqstannyń qarjylyq naryǵynyń 90 paıyzy osy jerge shoǵyrlanǵan.
El ekonomıkasynyń bazalyq quramdastarynyń biri retinde, kásipkerlikti damytýdyń erekshe rólin atap ótken J.Asanov, bıznesti qorǵaý maqsatynda prokýratýra qabyldap jatqan sharalar týraly aıtty. Bas prokýratýranyń, «Atameken» UKP-nyń jáne «Nur Otan» partııasy janyndaǵy RQSJQІK-niń birlesken jobasy - «Bıznesti prokýrorlyq qorǵaýdyń» negizgi baǵyttaryna toqtaldy. Elimizde jaıly bıznes-klımat qurý boıynsha júrgizilip jatqan jumystyń nátıjelerimen bólisti.
Jol kartasy sheńberinde qabyldanǵan júıeli sharalar nátıjesinde qazirden bastap oń dınamıka baıqalady.
Bas prokýrordyń sózinshe, SES pen TJ jelisi boıynsha tekseristerdiń 11 myń talaby joıylmaq. Adamdardyń qaýipsizdigi men densaýlyǵy úshin mańyzdy 3 myń talap qana qalady. Memleket basshysynyń tapsyrmasyn oryndaý sheńberinde ákimshilik protsesti izgilendirý boıynsha máseleler pysyqtalýda. Atap aıtqanda, bıznes úshin ákimshilik aıyppuldardy 30%-ǵa tómendetý jónindegi usynystar qazirgi ýaqytta Májiliste qaralýda. Ekonomıkalyq qylmystar qozǵaýdaǵy tásilder ózgerildi. Qylmystar tekserister men zııan aktileri bolǵan kezde ǵana tirkeledi. Nátıjesinde qylmystyq ister 10 esege azaıdy (Forýmǵa deıin - 6 myń, keıin - 560).
2017 jyldyń 1 shildesinen bastap kásipkerlerdiń uzaqqa sozylatyn sot talqylaýlary men orasan zor shyǵyndarsyz fıskaldarmen bolatyn daýlardy sheshe alatyndyǵyna nazar aýdaryldy. Ol úshin salyq jáne keden daýlary boıynsha sotqa deıingi apellıatsııa ınstıtýty quryldy.
Óz sózinde Jaqyp Asanov ýákiletti organdardyń jumysyndaǵy jekelegen júıeli kemshilikterdi, sondaı-aq problemaly máselelerdi atady. Qaraǵandy qalasyndaǵy tekserister boıynsha jumystyń nátıjeleri týraly aıtty. Onda Bas prokýratýra brıgadasy bıznes ókilderin qylmystyq protseske zańsyz tartý, zańsyz tekseristerdiń ýaqytyly jolyn kesý boıynsha sharalar qabyldamaý, kásipkerlerdiń ótinishterin sapasyz qaraý faktilerin anyqtady.
Bas prokýratýra elektrondyq formatqa, qylmystyq protsesti jeńildetýge jáne jedeldetýge kóshýdi usynady.
«Jedel qyzmetkerler, tergeýshiler nemese prokýrorlar qylmystyq protseste ózderin qojaıyn sezinbeýleri úshin, elektrondyq qylmystyq isti engizetin bolamyz. Bul barlyǵy ashyq bolý úshin qajet. Kez kelgen ýaqytta ne bolyp jatqanyn baqylaý jáne buzylǵan quqyqtyń suraýyn talap etý úshin kerek. Tergep-tekserý merzimderin qysqartamyz, ásirese aıqyn qylmystar boıynsha. Álemniń ózge elderinen kórip otyrǵanyzdaı, isterdi bizdegideı 3-5 aıda emes 1-2 kúnde aıaqtaıdy», - dedi bas Prokýror aımaq kásipkerlerimen kezdesýde.
Qadaǵalaý vedomstvosynyń basshysy bıznesti qorǵaý máseleleri boıynsha elektrondyq servısterdi damytýdy usyndy. Jaqyn ýaqytta «Bıznes-tiregi» portalynyń mobıldi qosymshasy iske qosylatyn bolady. Bas prokýratýranyń saıtynda «Zańdy birge jaqsartaıyq» atty arnaıy formýlıar bar, onda kásipkerler bıznestiń damýyna kedergi keltiretin normalardy kórsete alady. Onyń pikirinshe, bıznes-qoǵamdastyqtar quqyqtyq bazany jaqsartýǵa belsendirek qosylýy tıis. «Bıznestiń problemalaryn bıznesmenderdiń ózderinen artyq biletin eshkim joq», - dep atap ótti J.Asanov.
Jaqyp Asanov Memleket basshysynyń Joldaýyndaǵy negizgi baǵyttar men baǵdarlar týraly aıtty. Bul - bıznesti damytý, salyq zańnamasyn jeńildetý, baqylaý-qadaǵalaý fýnktsııalaryna aýqymdy tekserister júrgizý.
Konstıtýtsııalyq reformaǵa jeke toqtalyp ótti. Atap aıtqanda, Konstıtýtsııanyń 26-babyna usynylyp otyrǵan túzetýlerge qatysty pikirin bildirdi. Ol túzetýlerdiń sheteldikterge jer berý máselelerin kózdemeıtindigin atap ótti. Jer máseleleri negizgi zańnyń 6-babynda bekitilgen, jáne ol ózgertilmeıdi.
