Bas prokýror A.Daýylbaev kásipkerlik sýbektilerine jasalatyn tekseristerdiń zańdylyǵyn baqylaýdy tapsyrdy
«Áriptesterge, jergilikti jerlerdegi prokýrorlarǵa Ulttyq kásipkerler palatasynyń aımaqtyq bólinisterimen jan-jaqty qarym-qatynas ornatyp, Bas prokýratýra men Ulttyq kásipkerler palatasynyń búgingi sharasy negizinde ózara yqpaldastyq jáne áriptestik jóninde memorandýmdarǵa qol qoıýǵa, kásipkerlerdiń quqyqtaryn qorǵaý jumysynda tyǵyz baılanys ornatýdy tapsyramyn. Oblys prokýrorlaryna kásipkerlik sýbektilerine jasalatyn tekseristerdiń zańdylyǵyn tekserýdi jáne Memleket Basshysy bizden talap etkenindeı, olardyń sanyn qysqartý boıynsha sharalardy qabyldaýdy júkteımin», - dedi ol.
Onyń aıtýynsha, zańdylyq tek memlekettik organdar tarapynan ǵana emes, kásipkerlerdiń de tarapynan qatań ustanýy qajet. Osy turǵyda Bas prokýror UKP-nyń áriptestigine júginedi.
«Biz búgin memlekettik organdardyń basty maqsaty - bıznesti zańsyz qol suǵýdan qorǵaý ekendigin naqty túsinýimiz kerek. Quqyqqa qaıshy áreketterdi sottyq tártipte aldyn alýymyz qajet. Óz kezeginde kásipkerler qatarlarynda zań buzatyn qara nıetti kásipkerlerdiń sanyn azaıtýǵa barynsha atsalysýlary shart», - dep atap ótti A.Daýylbaev.
