Aktıvterdi qaıtarý jónindegi komıtet endi ınvestorlar quqyǵyn qorǵaý komıteti dep atalady — Joldaý
ASTANA. KAZINFORM — Qazaqstan Respýblıkasy Bas prokýratýrasynyń Aktıvterdi qaıtarý jónindegi komıteti endi ınvestorlar quqyǵyn qorǵaý komıteti dep atalady. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.
"Investıtsııaǵa tapsyrys" óndiristiń suranysyna saı jasalýy kerek. Elimizdegi ınvestorlarmen qarym-qatynas júıesi kúrdeli ári bytyrańqy. Qaǵazbastylyq kóp, túrli organdardyń quzyretteri qaıtalanady. Al qazirgi kúrdeli ahýal kezinde ınvestıtsııa tartý - kezek kúttirmeıtin másele, bizge jańa ustanym kerek. Qalaı bolsa da, ınvestıtsııa tartý boıynsha barlyq úılestirý jumysy tikeleı Premer-mınıstr mınıstrge júkteledi. Jańa mınıstrlik qurýdyń qajeti joq. Biraq, kózge ottaı basylatyn nárse: elimizde birde-bir mekemeniń ataýynda ınvestıtsııa degen sóz joq. Investıtsııa tipti, jetim bala sııaqty úsh-tórt mekemege ortaq másele bolyp, óz jolyn tappaı júr. Sondyqtan Premer-mınıstr 10 kún ishinde naqty usynys berýge tıis, — dedi Qasym-Jomart Toqaev.
Budan bólek, Úkimetke ınvestıtsııa tartý júıesin túgel jańǵyrtý jónindegi naqty is-sharalar josparyn meılinshe qysqa merzim ishinde ázirleý tapsyryldy.
— Menińshe, Bas prokýratýranyń Zańsyz aktıvterdi qaıtarý jónindegi komıtetiniń ataýyn Investorlardyń quqyǵyn qorǵaý jónindegi komıtet dep ózgertetin kez keldi. Bas prokýratýra zańsyz aktıv ıelerimen ónimdi jumys istegenin aıta ketý kerek. Sonyń nátıjesinde, qazynaǵa 850 mlrd teńgege jýyq qarjy qaıtaryldy. Bul qarajat 10 mektep, tórt sport ǵımaratyn salýǵa, 235 densaýlyq saqtaý nysany men 177 sý ınfraqurylymy nysanynyń qurylysyna jáne jóndeý jumystaryna bólindi. Respýblıkalyq bıýdjetke taǵy qosymsha qarajat túspek, — dedi Prezıdent.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.