Bas prokýratýraǵa saılaýǵa qatysty aryz-shaǵymdardyń deni «Ar.Rýh.Haq» qoǵamdyq qorynan túsken
ASTANA. 16 qańtar. QazAqparat /Rýslan Ǵabbasov/ - Saılaý kezeńinde aryz-shaǵymdardyń basym bóligi prokýratýraǵa «Ar.Rýh.Haq» qoǵamdyq qorynan tústi.
Bul týraly búgin Astanada ótken brıfıngte QR Bas prokýratýranyń resmı ókili Nurdáýlet Súıindikov málim etti.
Saılaý kezeńinde, daýys berý kúnin qosa alǵanda (104) prokýratýra organdaryna 536 aryz-shaǵym tústi, olardyń 64-i Parlament Májilisi, 472-si - máslıhattar saılaýyna qatysty.
«Zań buzýshylyqtar týraly aqparattardyń negizgi bóligi tıisti tekserýler barysynda óz dálelin tapqan joq»,-dedi resmı ókil.
Zań buzýshylyqtar týraly habarlamalar jekelegen jaǵdaılarda ǵana negizdi jáne shynaıy bolyp shyqty. Árbir osyndaı fakt boıynsha zańnamamen qarastyrylǵan sharalar qoldanyldy.
«Taldaý zańbuzýshylyqtar týraly aryz-shaǵymdardyń basym bóligi (60 nemese 11 %) prokýratýraǵa Baqytjan Tóreǵojına basqaratyn «Ar.Rýh.Haq» qoǵamdyq qorynan túskenin kórsetti. Atalǵan aryz-shaǵymdar bir mezgilde ınternet-saıtqa ornalastyrylyp, «zańbuzýshylyqtar kartasyna» jınaqtalǵan. Daýys berý kúniniń sońynda atalǵan ınternet-kartada saılaý zańnamasynyń buzylýy týraly 300-ge jýyq habarlama ornalastyrylǵan. Qazirge biz olardyń 296-syn tekserdik», - dedi N. Súıindikov.
281 jaǵdaıda (nemese 95 %) saıtta ornalastyrylǵan aqparat dáleldengen joq, alaıda saıt ákimshileri tıisti habarlamalardy oryn alǵan zańbuzýshylyqtar retinde usynǵan.
«Deı turǵanymen, tekserýler saıtta jarııalanǵan habarlamalardyń basym bóligi senimsiz jáne jalǵan ekendigin kórsetti», - dep túıindedi resmı ókil.
