Bas prokýratýrada izdestirýdiń jáne ekstradıtsııalaýdyń tıimdiligin arttyrý máseleleri talqylandy
Bas Prokýror Berik Asylovtyń tóraǵalyǵymen Zańdylyqty, quqyqtyq tártipti jáne qylmyskerlikke qarsy kúresti qamtamasyz etý jónindegi úılestirý keńesiniń otyrysy ótip, onda 2021-2022 jyldary jáne 2023 jyldyń ótken merziminde anyqtaýdan, tergep-tekserýden jáne sottan boı tasalaǵan adamdardy izdeý boıynsha quqyq qorǵaý jáne arnaýly memlekettik organdar qyzmetiniń tıimdiligi talqylandy. Kazinform bul týraly QR Bas prokýratýrasy-nyń baspasóz qyzmetine silteme jasap habarlaıdy.
Úılestirý keńesiniń jumysyna Joǵarǵy Sottyń ókilderi, quqyq qorǵaý jáne arnaýly memlekettik organdardyń, Tsıfrlyq damý mınıstrliginiń basshylyǵy men basqa da jaýapty tulǵalar, oblys prokýrorlary men aýmaqtyq qylmystyq qýdalaý organdarynyń basshylary qatysty.
Jıyndy ashqan Berik Asylov «Ádiletti memleketti qurýdyń negizgi belgisi, kez kelgen quqyq buzýshylyq úshin jazanyń bultartpastyǵy qaǵıdatyn júzege asyrýdyń negizgi faktorlarynyń biri – qylmystyq qýdalaýdan boı tasalaǵan azamattardy tıimdi izdestirý» ekenin atap ótti.
Bas Prokýror qylmyskerlerdi izdeýde belgili nátıjelerge qol jetkizilgenin de tilge tıek etti.
Jyl basynan beri 2 552 qylmysker, onyń ishinde adam óltirgeni úshin 30, tonaý qylmysyn jasaǵan 81, qaraqshylyq jasaǵan 15, alaıaqtyq jasaǵan 384, esirtki qylmystaryn jasaǵan 82 aıyptalýshy ustaldy.
Úılestirilgen is-sharalardyń jáne halyqaralyq seriktestermen aradaǵy ózara tyǵyz baılanystyń nátıjesinde sheteldik ıýrısdıktsııalardan aýyr jáne asa aýyr qylmystar, onyń ishinde adam óltirý, zorlaý, qarjy pıramıdalary men uıymdasqan qylmystyq top qurý qylmystary boıynsha 100 den asa kúdikti elge qaıtaryldy.
Bul rette ekstradıtsııalaý týraly kelisimderdiń joqtyǵyna qaramastan, aǵymdaǵy jyly Germanııadan, Kamerýnnan, Polshadan jáne Shvetsııadan izdeýde júrgen 7 adam ekstradıtsııalandy.
Qazirgi tańda Argentına, Brazılııa, Germanııa, Grýzııa, Ispanııa, BAÁ, Polsha, Reseı, Serbııa, Túrkııa, Ýkraına, Frantsııa, Chehııa jáne taǵy da basqa elderden izdeýde júrgenderdi ekstradıtsııalaý jumystary júrgizilip jatyr.
Іzdestirý jumysyna tsıfrlyq tehnologııalardy keńinen qoldanýdyń mańyzdylyǵy, memlekettik organdar men úkimettik emes uıymdardyń aqparattyq júıeleriniń barynsha ıntegratsııasynyń nátıjesinde izdeýde júrgen adamdardyń memlekettik, banktik, medıtsınalyq, kóliktik jáne taǵy da basqa qyzmetterdi alǵandyǵy jóninde ýaqtyly habarlaý qajettiligi atap ótildi.
Talqylaý nátıjeleri boıynsha, onyń ishinde «Interpol» Ulttyq bıýrosynyń jelisi boıynsha, izdestirý qyzmetiniń tıimdiligin arttyrýǵa baǵyttalǵan metodologııalyq jáne zańnamalyq keshendi sharalar ázirlendi.
Jalpy, qylmyskerlerdi izdeý qyzmetin jaqsartýǵa baǵyttalǵan basqa da sharalar usynyldy.
