Bas prokýratýrada probatsııa týraly zańnamanyń saqtalýy talqylandy

ASTANA. QazAqparat - Búgin Bas prokýror Qaırat Qojamjarovtyń tóraǵalyǵymen Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótkizildi. Onyń barysynda ýákiletti organdardyń probatsııa týraly zańnama qaǵıdalarynyń saqtalýy talqylandy, dep habarlaıdy QazAqparat tilshisi.

Bas prokýratýrasynyń baspasóz qyzmetiniń məlimetinshe, otyrysqa Prezıdenttiń kómekshisi - Qaýipsizdik Keńesiniń hatshysy Ǵ. Baıjanov, Prezıdent Ákimshiliginiń jáne múddeli mınıstrlikter men vedomstvo ókilderi, sondaı-aq Úılestirý keńesiniń músheleri qatysty.

Memleket basshysynyń tapsyrmasyn oryndaý barysynda qylmystyq zańnamany izgilendirý saıasaty iske asyrylýda.

2011 jyldan bastap qaýiptiligi tómen qylmystardy qylmystyq sıpattan aryltý jáne qylmystyq protsestiń repressıvtiligin tómendetý boıynsha birqatar reformalar júrgizilip keledi.

Otyrysta probatsııa esebinde turǵan tulǵalardy qoǵamǵa jedel beıimdeýge baǵyttalǵan áleýmettik jáne psıhologııalyq kómek máselelerine erekshe nazar aýdaryldy.

«Balamaly jazalaý túrlerine taǵaıyndalǵan  jáne buryn sotty bolǵan tulǵalardy tıimdi áleýmettendirý jumysyn izgilendirý aıasynda júrgizý qajet», - dep atap ótti  Q. Qojamjarov.

Odan bólek kásibı oqytý, jumyspen qamtý jáne jekemenshik isterge shaǵyn nesıe berý máseleleri talqylandy.

Atalǵan jumystyń tıimdiligi kóp jaǵdaıda memlekettik jáne jergilikti atqarýshy organdardyń ózara qarym-qatynasyna tikeleı baılanysty.

Bas Prokýrordyń paıymdaýynsha, probatsııa ınstıtýtynyń qyzmet erekshelikteri qaıta qaraýdy qajet etedi jáne EYDU memleketteriniń oń tájirıbesin qoldaný kerek.

Esepte turǵandardyń qozǵalý baǵytyn belgileý úshin olarǵa elektrondy bilezikter taǵyp, probatsııa ınspektorlaryn beınetirkeýishtermen  jabdyqtaý usynysy aıtyldy.

Úılestirý keńesiniń qorytyndysy boıynsha probatsııa qyzmetiniń tıimdiligin halyqaralyq standarttar talabyna saı arttyrýǵa baǵyttalǵan keshendi sharalar daıyndaldy.