Bas prokýratýrada ardagerlerge qurmet kórsetildi
Merekeniń basty, qurmetti qonaqtary prokýratýra organdarynyń Uly Otan soǵysy maıdandarynda shaıqasqan ardagerleri boldy. Bul týraly vedomstvonyń baspasóz qyzmetinen habarlandy.
Bas Prokýror Ashat Daýylbaev saltanatty jınalysty ashyp, Jeńistiń 67 jyldyǵymen ardagerlerdi shyn júrekten quttyqtap, olardyń eren erlikteri úshin sheksiz alǵysyn bildirdi. «Barlyq urpaq úshin 9 mamyr - bizdiń halyqtyń shydamdylyǵy men qaıratyn, Otanǵa degen sheksiz súıispenshiligin kórsetetin erekshe jáne jarqyn mereke. Ákeler men atalardyń erlikteri urpaqtyń esinde máńgi qalady jáne olardyń uldary, nemereleri jáne shóbereleriniń beıbit, ashyq aspanda ómir súrýi jáne de olardyń bastaryna túsken barlyq aýyrtpalyqtar men syndardy erlikpen kóterip, barlyq múmkin bolǵan jaǵdaıdy jasap, Jeńisti jaqyndatqandary úshin halyq máńgilik rızashylyǵyn bildiredi», degen Bas prokýror eshkim de, eshteńe de fashızmdi jeńýdegi halyqtyń uly erligin jáne onyń búkilálemdik tarıhı maǵynasyn umytpaýy kerektigin atap ótti.
A. Daýylbaev soǵys ardagerlerine vedomstvolyq nagradalar jáne baǵaly syılyqtar tapsyrdy. Aqsaqaldar jas urpaqqa Otannyń táýelsizdigi úshin ózderiniń ómirlerin aıamaǵandarǵa laıyqty bolýdy, prokýrorlyq kásiptiń úzdik dástúrlerin saqtaý jáne kóbeıtý jaıynda tilekterin aıtty. Budan bólek, Otan qorǵaýshy kúnine jáne egemendi Qazaqstannyń Qarýly Kúshterine 20 jyl tolý merekesine oraı minsiz qyzmeti, zańdylyqty nyǵaıtý jáne jas urpaqty tárbıeleýge qosqan úlesi úshin Bas Prokýror prokýratýra organdarynyń birqatar qyzmetkerlerin, sonymen qatar Aýǵanstanda ózderiniń ınternatsıonaldyq boryshyn ótegenderdi «Qazaqstan Respýlıkasynyń Qarýly Kúshterine 20 jyl» merekelik medalimen, mekemelik nagradalarmen, sondaı-aq kezekten tys synyptyq shender tapsyryp, marapattady.
