Bas prokýratýra jetkinshekterdiń toptasyp tóbelesýi beleń alǵanyna alańdaýly
Bas prokýror Berik Asylov otbasylyq-turmystyq zorlyq-zombylyq profılaktıkasy men qoǵamdyq oryndarda quqyq buzýshylyqtyń aldyn alý máseleleri jónindegi úılestirý keńesiniń otyrysynda jasóspirimder arasynda toptasyp tóbelesý beleń alǵanyna alańdaıtynyn aıtty, dep habarlaıdy Kazinform.
«Keıingi kezde jetkinshekterdiń túnde toptasyp tóbelesý faktileri jıilep ketti. Ótken aıda Aqtaý qalasynda 19 oqýshy men stýdent tóbelesti. Shymkent qalasy men Túrkistan oblysynda 15 oqýshynyń tóbelesi eki adamnyń ólimimen aıaqtaldy. Árıne, onyń basty sebebi – ata-ana tarapynan qajetti baqylaýdyń bolmaýy. Bıyl túngi ýaqytta kóshede júrgeni úshin kámeletke tolmaǵan 86 myń adam ákimshilik jaýapkershilikke tartyldy», – dedi Bas prokýror.
Vedomstvo basshysynyń málimetinshe, Aqtaýda jasóspirimder tóbeleske 4 kún boıy daıyndalǵan.
«Polıtsııa balalar arasyndaǵy shynaıy jaǵdaıdy jóndi bilmeıdi. Al bilim berý oryndarynda táýekel aımaǵyndaǵy oqýshylardy anyqtaý jumysy durys jolǵa qoıylmaǵan», – dedi Berik Asylov.
