Bas prokýratýra jetim balalardy qamqorlyǵyna alýshylar men patronat tárbıeshilerge tólemderdi arttyrýdy usyndy
Bul týraly búgin Astanada ótip jatqan alqa májilisinde QR Bas prokýratýrasy Áleýmettik-ekonomıkalyq saladaǵy zańdylyqty baqylaý boıynsha departamentiniń bastyǵy Qanat Seıdǵapbarov málim etti.
Onyń paıymdaýynsha, patronattyq tárbıe berý júıesin damytý kerek. «Qamqorlyǵyna alýshylar men patronat tárbıeshilerge tólemderdi arttyrý arqyly ınternattyq mekemelerde jetimderdiń sanyn tómendetýge múmkin bolar edi»,-dedi departament basshysy.
Onyń aıtýynsha, Qazaqstanda ata-anasyz qalǵan 34 myń balanyń tek 2 myńy nemese 6 paıyzy ǵana patronattyq tárbıede. Buǵan qamqorlyqqa alý men patronattyq tárbıe berýdiń jetkiliksiz deńgeıde qarjylandyrylýy sebep bolýy múmkin. Máselen, ınternattyń bir tárbıelenýshisine aı saıyn 70 myń teńgeden astam qarjy qarastyrylady. Al, qamqorlyqqa alýshylarǵa bir bala úshin 17 myń teńge, sondaı-aq patronat tárbıeleýshilerge 27 myń teńge bólinedi eken.
