Bas prokýratýra jertólede jáne jartylaı jertólede ornalasqan 23 ýaqytsha oqshaýlaý ızolıatoryn jabýdy usynady
ASTANA. Qazannyń 27-si. QazAqparat /Marlan Jıembaı/ - QR Bas prokýratýrasy elimizdiń Úkimet men Іshki ister mınıstrligine jertólede jáne jartylaı jertólede ornalasqan 23 ýaqytsha oqshaýlaý ızolıatoryn jabýdy usynbaq.
Bul týraly búgin atalǵan vedomstvonyń alqa májilisi barysynda Qylmystyq protsestiń barysynda mamandandyrylǵan mekemelerge ornalastyrylǵan jáne qylmystyq jazany óteýshi adamdardyń quqyqtarynyń saqtalýyn qadaǵalaý departamentiniń bastyǵy Nurǵalym Ábdirov málim etti.
Onyń atap ótýine qaraǵanda, júrgizilgen prokýrorlyq tekserý barysynda ІІM júıesindegi 217 ýaqytsha oqshaýlaý ızolıatorynyń 23 jertólede nemese jartylaı jertólede ornalasqandyǵy anyqtalǵan. Bul qylmys jasaǵandar men kúdiktilerdiń qamalý jaǵdaılaryna qaıshy keledi.
«Atalǵan 23 ýaqytsha oqshaýlaý ızolıatorynyń budan ary jumys isteýi múmkin emestigi aıqyn. Sondyqtan ІІM ókilderi tarapynan bul qıyndyqtan shyǵýdyń naqty sharalary kórsetilgen usynystar kútilýde», - dep atap ótken N.Ábdirov bul tyǵyryqtan shyǵýdyń joldary retinde kúdiktiler men aıyptalýshylardy Ádilet mınıstrligine qarasty tergeý ızolıatorlaryna ornalastyrýdy usyndy.
Sondaı-aq onyń pikirinshe, ІІM atalǵan 23 ızolıator ornalasqan óńirlerde jańadan ǵımarat salý úshin bıýdjetten qarjy bólinýine muryndyq bolýy kerek. Alaıda onyń atap ótýine qaraǵanda, 2011-2013 jyldarǵa arnalǵan Іshki ister mınıstrliginiń ınvestıtsııalyq jobalarynda quny 21,5 mlrd. teńgeni quraıtyn, quramynda ızolıatory bar 17 aýdandyq ishki ister bóliminiń ǵımaraty ǵana qarastyrylǵan. Al joǵaryda atalǵan problemaly mekemeler nazardan tys qalyp otyr.
