Bas prokýratýra jaýap alý úshin Áblıazovty elge shaqyrdy

ASTANA. QazAqparat - QR Bas prokýratýrasy Muhtar Áblıazovty jaýap alýǵa shaqyrtty, dep habarlaıdy QazAqparat tilshisi vedomstvonyń baspasóz qyzmetine silteme jasap.

«Kúdikti Áblıazov Muhtar Qabyluly, Sizge 2018 jylǵy 16 tamyz saǵat 15.00-ge deıin Qazaqstan Respýblıkasy Bas prokýratýrasynyń ákimshilik ǵımaratyna Jedel-tergeý tobynyń basshysy - Qazaqstan Respýblıkasy Bas prokýrorynyń kómekshisi Bekjan Ermuhanbetulyna kelý kerek. Mekenjaıymyz: Qazaqstan Respýblıkasy, Astana qalasy, Máńgilik el dańǵyly, 14»,- delingen M. Áblıazovqa arnalǵan úndeýde.

Qylmystyq-protsessýaldyq kodekstiń 208-baby, 1-bóligine sáıkes, kúdiktiden jaýap alý úshin arnaıy shaqyrtý jiberiledi.

«Bas prokýratýra Mýhtar Áblıazovke qatysty asa aýyr qylmys jasaý faktisi boıynsha qylmystyq isti tergeıdi. Tergeý barysynda E.N. Tatıshevti qasaqana óltirýdi uıymdastyrý maqsatynda jasalǵan zańǵa qaıshy áreketti anyqtaýǵa múmkindik beretin dálel tabyldy» delingen Bas prokýratýranyń baspasóz qyzmetiniń habarlamasynda.

Alaıda Áblıazov M.Q. Qazaqstannan tys elde júrgendikten jáne Qazaqstanǵa kelýden jaltarǵandyqtan, QR Bas prokýratýrasy kúdiktini jaýap alýǵa shaqyrtý úshin elimizdiń jáne dál qazir Áblıazov júrgen Frantsııanyń buqaralyq aqparat quraldary arqyly habarlandyrý jarııalady.