Bas prokýratýra: Zattaı aıǵaqtardyń joǵalý jáne urlaný faktisi boıynsha 17 qylmystyq is qozǵaldy
ASTANA. 22 qańtar. QazAqparat - QR Bas prokýratýrasy men óńirlik prokýratýra organdary ótken jyldyń sońynda ishki ister, qarjy polıtsııasy, Ulttyq qaýipsizdik komıteti men keden qyzmeti organdarynda zattaı aıǵaqtar men ózge de alynǵan múlikterdiń, eń aldymen, esirtki quraldary, qarý jáne oq-dárini saqtaý máseleleri boıynsha tekserister júrgizdi. Bul týraly atalǵan vedomstvonyń baspasóz qyzmetinen habarlady.
Vedomstvonyń atap ótýinshe, tekseristerdiń qorytyndylary boıynsha zattaı aıǵaqtardy joıý jáne olardy ózge memlekettik organdarǵa berý barysynda zańnamanyń buzylýy anyqtaldy. Zattaı aıǵaqtardyń joǵalý jáne urlaný faktileri boıynsha prokýrorlar Aqtóbe, Qyzylorda, Pavlodar, Ońtústik Qazaqstan, Soltústik Qazaqstan, Batys Qazaqstan jáne Qostanaı oblystarynda 17 qylmystyq is qozǵady.
Mysaly, Shymkent qalasynda tekserý barysynda Bas prokýratýranyń qyzmetkerleri 2007 jyly oqıǵa ornynan alynǵan qarýdyń joǵalý faktisin anyqtady. Qarý zattaı aıǵaq retinde tanylyp, qylmystyq iske qosa tirkelgen bolatyn. Biraq keıinnen ol tirkelmegen jáne belgilengen tártipte saqtaýǵa ótkizilmegen. Qarýdy Ońtústik Qazaqstan oblysynyń ІІD Uıymdasqan qylmysqa qarsy kúres basqarmasynyń qyzmetkeri urlap alǵan. Tekseris barysynda Uıymdasqan qylmysqa qarsy kúres basqarmasynyń qyzmetkerleri aqshalaı syıaqyǵa anyqtalǵan buzýshylyqty jasyryp qalǵylary kelgen. Olardyń bireýin oblystyq UQK departamentiniń qyzmetkerleri Bas prokýratýra qyzmetkerine para bermek bolǵan sátte ustady. Osy fakt boıynsha qylmystyq is qozǵaldy, tergeýmen Bas prokýratýra aınalysýda.
Sondaı-aq ІІM, EQSJKA, UQK-ge zań buzýshylyqqa jol bergen tulǵalardy jazalaý máselesin qoıa otyryp, usynys engizildi.
