Bas prokýratýra zańsyz sherýge qatysyp, ákimshilik jaýapqa tartylǵandar týraly aıtty
NUR-SULTAN. QazAqparat - QR Bas prokýratýrasynyń Qoǵamdyq múddelerdi qorǵaý qyzmetiniń bastyǵy Saparbek Nurpeıisov saılaýdan keıingi sherýlerge qatysqan adamdardyń qanshasy qamaýǵa alynǵanyn aıtty, dep habarlaıdy QazAqparat tilshisi.
Onyń aıtýynsha, zańsyz aktsııalar men sherýlerge qatysqany úshin sot sheshimimen 957 adam ákimshilik jaýapqa tartylǵan.
«Bas prokýratýra ruqsat etilmegen aktsııa, sherýlerge qatysý zańsyz ekenin birneshe márte eskertti. Arandatýǵa boı aldyrǵan otandastarymyz birneshe qalada qarsylyq aktsııalaryna shyqty. Saldarynan 3 polıtsııa qyzmetkeri dene jaraqatyn aldy. Degenmen, polıtsııa ustamdylyq tanytyp, arnaıy zattardy qoldanbady»,- dedi Bas prokýratýra ókili.
Saparbek Nurpeıisov solardyń ishinde 670 adam qamaqqa alynyp, 115 adamǵa aıyppul salynǵanyn, al 172 adamǵa eskertý jasalǵanyn aıtady.
«Qadaǵalaý ókilettigi aıasynda prokýratýra ustalǵandardyń zańsyz áreketin túsine otyryp, otbasylyq jaǵdaıyn eskerip, sot oryndaryna 311 adamnyń qamaý merzimin qysqartý boıynsha usynym hat jiberdi. 63 adam búgin shyǵady. Qazir qamaqta 180 adam bar. Onyń 80-i - Nur-Sultan qalasynda, 100-i - Almatyda qamaýda. Olardy qamaý merzimi - 6-15 kún aralyǵynda», - dedi Saparbek Nurpeısiov.
