Bas prokýratýra WhatsApp messendjerine qatysty jańa kıberqater týraly eskertti

— Sheteldik derekkózderdiń málimetine sáıkes kıberalaıaqtar WhatsApp akkaýnttaryn basyp alýdyń jańa qylmystyq shemasyn qoldanyp otyr. Bul ádis «GhostPairing» dep atalady jáne parolderdi buzýdy, SIM-kartalardy aýystyrýdy nemese kúrdeli tehnıkalyq shabýyldardy qajet etpeıdi. Alaıaqtar WhatsApp-qa zańdy túrde, qosymsha qurylǵylardy baılanystyrý fýnktsııasyn paıdalaný arqyly qol jetkizedi, — delingen habarlamada.

Paıdalanýshyǵa Facebook nemese WhatsApp atynan jasyrynǵan habarlama jiberiledi, ol Facebook pen WhatsApp ınterfeısin vızýaldy túrde qaıtalaıtyn jalǵan paraqshalarǵa baǵyttaıdy.

— Kontentke qoljetimdilikti rastaý úshin feık-paraqsha telefon nómiri men rastaý kodyn engizýdi usynady, osydan keıin zııankes avtomatty túrde jábirlenýshiniń akkaýntyna senimdi qurylǵy retinde qosylyp, WhatsApp-qa tolyq qol jetkizedi (habarlamalardy oqý, medıafaıldardy qaraý, baılanystar tizimi, habarlama jiberý, fotogalereıaǵa qoljetimdilik). Bul rette telefon ádettegideı jumys isteı beredi jáne kúdik týdyrmaıdy, — delingen Bas prokýratýra habarlamasynda.

WhatsApp-tyń basyp alýyn anyqtaýdyń jalǵyz joly — «Baılanystyrylǵan qurylǵylar» bólimin qolmen tekserý. Kez kelgen belgisiz qosylý akkaýnttyń buzylǵanyn kórsetedi jáne dereý joıylýy tıis.

Saq bolyńyzdar, kıberqaýipsizdik talaptaryn saqtańyzdar:

— belgisiz kiris habarlamalarǵa, qońyraýlarǵa jáne ár túrli habarlandyrýlarǵa muqııat bolyńyzdar;

— «WhatsApp» kodyn bógde paraqshalarǵaengizbeńizder, qosymshadan tys jerde kodty suratý — alaıaqtyq;

— eki faktorly aýtentıfıkatsııany paıdalanyńyzdar;

— akkaýntyńyzdyń belsendiligin turaqty túrde tekserip otyryńyzdar;

— qorǵanysh baǵdarlamalyq qamtamasyz etýdi qoldanyńyzdar.

Aıta ketelik Ulttyq bank qazaqstandyqtarǵa qaýip týraly eskertken edi.